SA RELOKASYON NIN MGA POSTE: Casureco II, NEA iyo an nag-aabala

January 4, 2018

Canaman, Camarines Sur -  An Camarines Sur II Electric Cooperative (Casureco II) asin National Electrification Administration (NEA) iyo man sana an nag-aabala sa proceso sa relokasyon sa tamang lugar kan saindang mga electrical post na apektado kan road widening project kan Department of Public Works and Highways (DPWH) huli kan ginigibong pagbago naman kan saindang saindang cuentada.
 
Ini an tuyaw ni Assistant District Engr. Richard Emmanuel Ragragio kan 2nd Engineering District kan DPWH sa Camarines Sur matapos enot nang nagsumiter kan saindang cuentada an Casureco II na may babayaran an ahencia nin P16.8 milyon sa mga poste na gagaboton sa laog kan national highway sa Ciudad nin Naga asin pagtaraid na banwaan nganing ibalyo sa tamang lugar alagad nagbago naman kan saindang costing huli ta pati an pagribay kan bagong mga electrical post papabayadan pa sa saindang opisina.

Base sa Joint Circular kan Department of Energy (DoE) asin kan DPWH an saindang kasundoan nag-epekto kan Hulyo 20, 2017 asin an costing sa relokasyon kan mga poste kan mga cooperativa nin electricidad papasanon kan obras publika.

Isusumiter kan cooperativa sa NEA nganing saindang aprobaran an costing sa relokasyon asin kun mayo nang problema sa cuentada saindang iindorsar sa DPWH nganing tagamahan nin fondo. An patrabajo magtatarabangan an ahencia asin cooperativa nin electricidad mantang sinda an igwang pagkasabot sa lado nin electrical.

An Joint Circular nakatalaan magpaso sa Agosto 2018, huli kaini duda si Ragragio na posibleng magkaigwa nin problema sagcod na maabala an relokasyon asin an mangyayari kaini an Casureco II  iyo na an may sisimbagong sa gastos sa relokasyon kan mga electrical post.

Pigsumiter na kan 2nd Engineering District si P16.8 milyon na costing alagad mawot naman bagohon an cuentada kan Casureco II. Kun arog kaini padagos na dai mahahali an mga poste sa mga national road.

Si Congresista Gabriel H. Bordado Jr. kan tercer distrito kan Camarines Sur haloy nang naghuhurot na dapat punan na an relokasyon alagad kun dai mangyayari dapat igilid na muna an implementasyon kan mga road widening project sagcod na dai nagkakaharali an mga ulang sa tinampo.

Delicado sa mga aksidente sa trafico kun padagos na nagdadanay an mga estractura sa national road, sabi pa.
 

 

Share on Facebook
Share on Twitter
Please reload