13ng kalye, sona manga flood-prone area - CEO

January 11, 2018

Treceng kalye asin sona kan siyam sa viente  siete mga barangay sa Ciudad nin Naga an declarado kan City Engineer’s Office (CEO) kan lokal na gobierno sa ciudad  bilang mga flood prone area na igwang total na 170,200 metros cuadrado na kaipuhan an  P53.3 milyon na fondo.

Ini an pigbiklad ni City Engr. Leon ‘Chito’ Palmiano sa sesyon regular kan Sanggunian Panlungsod kasunod kan privilege speech ni Consejal Joselito Del Rosario sa sesyon regular kan nakaaging Noviembre 2017 na nagpapasabot na dakul pang mga lugar sa ciudad an flood-prone area na maninigo nang hanapan nin solusyon kan ciudad.

Alagad si Del Rosario, pamayo kan Committee on Public Safety nagcuestion man sa report ni Palmiano huli ta igwa pang mga lugar na mayo sa listahan na mga binabahang barangay asin ini iyo an mga minasunod; Argentina-Liboton-Calauag na inaabot nin sarong bulan antes mawara an tubig baha, Bagong Lipunan  kan Brgy. Liboton, tinampo sa atubangan kan Ever Supply kan Brgy. Pacol, Salonguigi sa Brgy. Cararayan asin Pagdahicon sa Brgy. Mabulo.

Sinabi pa kan CEO na nagkapera nang mga storm asin lateral drainage an nahaman kan ciudad alagad kulang pa nganing maresolberan an haloy nang problema sa tubig baha na kaipuhan  an fondo na cantidad P23.3-M para magpaconstruhir nin dugang na drainage project na isusumpay sa storm drainage asin P30-M para sa rehabiliyasyon kan nagkapera pang drainage.

Kabali sa mga listahan kan CEO na mga flood prone area iyo an mga minasunod; Villa Karangahan Subdivision asin Capilihan Street kan Brgy. San Felipe, Rosal St kataid kan Abcede Elementary School sa Brgy. Bagumbayan Sur, Puro St. asin Manga St., Brgy. Sta. asin Sta Cruz Elementary School kan brgy. Sta. Cruz, Looban 1-2 Bayawas St., Brgy Abella, Brillante Compound, Sitio Marasigan, sa Brgy. Sabang,  sarong zona sa kataid kan AMA College, Magsaysay Ave, sa Brgy. Balatas, Isarog Avenue, sa Brgy. Tinago, sa likodan kan Julian Meliton Elementary School 4th, 5th, 6th, asin 7th Streets sa Concepcion Grande, Zona cinco sa Brgy. Balatas, palaog kan Cokeville sa Brgy. San Felipe asin Perlita St., asin Villa Sorabella, Brgy. Concepcion Grande.

Sa lado kan Committee on Infrastructure na pinamamayohan  ni Consejal Vidal Castillo, sinabi kaini na dawa igwa pang mga barangay na kabali sa flood prone area alagad dakul nang mga storm drainage an natapos kan CEO nganing maresolberan an tubig baha sa ibang mga barangay kan ciudad.

FONDO SA INFRASTRACTURA  KULANG

Si Consejal Mila Raquid-Arroyo nagsabi ki Engr. Palmiano na kun kaipuhan an total na P53.3-M para sa drainage project asin rehabilitasyon kaini dai mareresolberan ngonian na taon an problema sa tubig baha sa mga barangay na declarado bilang flood prone area mantang an alokason sa 2018 annual budget igwa sanang total na P60-M.

Pigpaliwanag kan CEO na an alokasyon na P60-M naka-lump sum para sa mg proyecto sa infrastractura na kinababalihan sa mga patinampo, edipisyo asin drainage project.

Igwa mga lugar na perming piglalantop nin tubig baha iyo an saindang tatawan nin prioridad alagad si ibang barangay marerealisar sa masunod na taon 2019, sabi pa.

Alagad sa listahan kan CEO nakatalaan magpaconstruhir nin storm drainage pasiring sa Colgante Bridge na pigpunan an patrabajo sa enot na semestre ngonian na taon.

CEO MAYONG FLOOD CONTROL OFFICER

Hinapot ni Bise Alcalde Nelson Legacion, pamayo kan SP kun igwang Flood Control Officer an CEO, alagad sinabi ni Palmiano na mayo sindang designadong opisyal digdi envez sinda mga ingeniero sa opisina iyo an nagtatarabang bako lang nakatutok sa drainage project alagad sa iba pang mga proyecto sa infrastractura.

Hinagad kan bise alcalde sa CEO na magcoordinar sa City Reduction Officer kun arin an dapat  tawan nin prioridad kun bako gabos sa listahan  makakabali sa proyecto mantang kulang an alokasyon kan ciudad sa infrastructure project.

Si Consejal Del Rosario, pamayo kan Committee on Infrastructure pigsusuportaran an suhestiyon kan pamayo kan SP mientras na mahalagang marhay an pag-aadal asin matawan nin prioridad an sinambit na haloy nang problema sa baha.                                                                                                              (DPA)







 

Share on Facebook
Share on Twitter
Please reload