Pagsuspendi nin klase kan LGU, pigpaliwanag kan DepEd

Pili, Camarines Sur – An jefe ejecutivo kan arin man na lokal na gobierno pueding magdesisyon na magsuspendi nin klase sa mga escuelas publika kun igwang anuncio an PAGASA na magkakaigwa nin mga pag-uran na pueding gikanan nin mga pagbaha bako lang kun igwang nagdadangadang na bagyo. Dai na maghalat sa Capitolyo Provincial mientras na sinda an nakakaheling kan saindang escuelahan o lugar na pueding sanupon nin tubig baha. Ini an mga pahayag sa media ni School Division Supt. Arnulfo Balane kan Departmento de Edukasyon (DepEd) sa Camarines Sur sa tahaw kan pagbasol kan ibang magurang na nakakabuyo sa escuelahan an saindang esudiantes alagad mapaluwas man lang nin suspension kan klase. Afuera pa kaini, an magurang nasadiri nang suspendi kan klase sa paagi kan dai pagpalaog kan saindang estudiantes sa escuelahan. Puede man ini mangyari magkua sana nin certificasyon sa Punong Barangay kun dai pinalaog sa klase an saindang estudiante huli kan tubig baha asin iba pang validong dahilan, sabi pa kan DepEd. Kan nakaaging bulan nin Deciembre nagkaperang veces nagsuspendi nin klase si Gobernador Migz Villafuerte huli kan maraot na panahon asin padagos na pagbulos nin uran, tolos man ining pig-aanuncio sa manlaen-laen na estaciones nin radio asin television maging sa saiyang face book. Alagad igwa pa giraray ibang magurang nagrereclamo na dai ninda aram na igwang suspension nin klase. Huli kaini, puedeng dai na maghalat sa Capitolyo Provincial envez an lokal na ejecutivo sa sarong banwaan pueding magdesisyon asin ibandilyo an suspension of classes, segun pa sa DepEd Camarines Sur. Kan nakaaging bulan nin Deciembre si anuncio nin bagyo kan PAGASA yaon sa rehiyon kan Mindanao alagad an lakop na mga pagbulos nin uran na puedeng gikanan nin tubig baha asin landslide kaya nagdesisyon an joven na gobernador na suspendiron an klase sa gabos na level. Sa Ciudad nin Naga an lokal na gobierno dai nagsuspendi nin klase mantang mayo man na gayong apektado digdi mga escuelahan asin regular an viaje kan mga pampapasajerong sasakyan. An mga ejecutivo lokal awtorisado kan DepEd na magsuspendi nin klase base sa saindang pinaluwas na memorandum circular.