Kapiestahan kan Itom na Nazareno pigcelebrar kan Nagueños

Taon-taon nagdadakul an numero nin mga devotos na nagpaparticipar sa penitential procession sa Itom na Nazareno sa Ciudad nin Naga na dinadayo na nin mga nagpepenetencia hali sa pagtaraid na banwaan kan ciudad sa ginibong ika-29 kapiestahan kaini kan Martes, Enero 9. Ngonian na taon nagtriple an mga devotos sa ginibong prosesyon kun icocompara kan nakaaging taon hali sa Holy Cross Parish Church kan Barangay Tabuco sagcod sa mga mayor na kalye kan centro kan ciudad asin an penitential procession digdi kasabay man kan actividad religioso kan Itom na Nazareno sa Quiapo, Manila, sabi ni Ernesto Elcamel jefe kan City Disaster Risk Reduction and Management Office. Si Ben Beguia, presidente kan Hijos de Nazareno Association nagsabi na nagdakul si mga nag-atendir na devotos huli kan marhay si kamugtakan kan panahon bakong arog kan nakaaging taon apektado si prosesyon mantang padagos si pagbulos nin uran. Sinabi pa ni Elcamel kan nakaaging taon 2017 maabot sa viente mil si nagparticipar sa prosesyon alagad sa ngonian nasa 60 mil mala ngani nagparalaba si prosesyon. An tradisyonal na actividad digdi, sa paagi nin mga misa na napuon Deciembre 31, 2017 hasta Enero 9, 2018. An aroaldaw na misa na ginigibo pakatapos kan novena en onra sa Puong Nazareno. An mga pag-andam sa taonan na celebracion sa kapiestahan kan Itom na Nazareno pinapadalagan kan Hijos de Nazareno Association sa superbisyon kan Archidiocesis nin Caceres asin ni Reverendo Padre Felix S. Abaño. Jr. Cura Paroko kan Holy Cross Church iyo an nangenotan sa misa sa kapiestahan kan Enero 9, ngonian na taon. Si Padre Abaño iyo an nagconducir nin misa antes nagluwas kan Itom na Nazareno sa simbahan para sa prosesyon. Si Arsobispo Rolando Tria Tirona kan Caceres iyo man an nangenotan sa misa sa Itom na Nazareno sa Barangay Binanuanan, Calabanga, Camarines Sur na igwa man nin kaparejong imahen. An kaparejong kapiestahan sabay man na pigcelebrar sa Canaman, Cam. Sur asin Ciudad nin Iriga.