Tsismis ibabawal na sa brgy.

January 18, 2018

An tsismis na ugali kan Filipino na nagiging causa nin iriwal sa sarong sadit na comunidad ibabawal na kan sarong barangay sa Ciudad nin Naga asin puedeng castigohon nin multa asin tolong aldaw na community service kun maprobaran sa investigasyon an  tsismoso o tsismosa.

An ordinansa numerado 2017-003  na ‘’Anti Tsismis Ordinance pasado na sa Barangay Council kan Bagumbayan Norte sa saindang sesyon regular kan Oktubre 17, 2017 asin pendiente na sa Committee on Ordinance na pinamamayohan ni Consejal Rayan Cydrick Rentoy para sa magkakanigong pag-adal kan Sangguniang Panlungsod (SP) antes iimplementar kan sinambit na barangay.

Sinabi ni Rentoy na sainda nang inaadalan an ordinansa kan barangay asin pinasa muna sa pag-aadal kan City Legal Officer Abogado Jun-Jun Bragais antes isunad sa en banc session kan SP.

Si Punong Barangay Antonio Beltran nagsabi  na nagtutubod sinda sa paagi kan tsismis ordinance mababawasan an iriwal sa barangay na nagpuon sa mga tsismisan.

Pinasar an ordinansa sa pangenot ni Kgd. Lolita Nantes, Chairman kan Committee on Children asin katuwang sinda Kgd. Romeo Calañada asin Kgd. Racquesl Tutanes.

Nganing mapundo na an ugali kan salang  gawi sa pagpalakop nin mga tsismis maging totoo man o hearsay an ordinansa iyo na an saindang basehan legal nganing macastigo an mga pasaway sa saindang comunidad, sabi pa.

Nakatalaan mag-imponer nin multang P500.00 asin tolong aldaw na community service sa enot na pagkakasala;  P700 asin limang aldaw na community service sa ika duwang pagkakasala; asin P1,000.00 asin pitong aldaw na community service sa ika-tolong pagkakasala.

An consejo de barangay mabilog nin Technical Working Group na iyo an ma-investigar kan caso na kinababalihan kan Punong Barangay bilang chairman, Kgd. na pamayo kan Blue Ribbon Committee asin Kgd. na pamayo kan Committee on Women/VAWC Desk Officer, Paralegal Officer asin representante kan Lupon.  

Sa Sanggunian Panlungsod, si Bise Alcalde Nelson Legacion, nagpahayag sa entrevista kan Bicol Mail na pigbabasehan ninda  sa pagdeterminar kan sarong ordinansa na pinasar kan consejo de barangay limitado sa determinasyon kun si na-ipasar na ordinansa base sa poder kan barangay alagad kun mayo sa poder ninda ibabalik kan SP o ibabasura.

Susog sa Section 391 kan Local Government Code an Sanggunian Barangay bilang sarong legislative body kan barangay alagad kaipuhan magcomple sa sarong ley alagad an punto kan consejo de barangay sa isyu para sa inaapod na ‘’promote the general welfare’’ kan habitantes kan comunidad ini mayong cuestion legal.

Afuera pa kaini,  mayong ordinansa an pueding ipasar sa mas nakakalangkaw na legislative body. Sa heling ko na sustenir digdi si validity kan sinambit na ordinansa, sabi pa kan bise alcalde.

Si Consejal Tomas Ramon Sanchez Jr., pamayo kan Liga ng mga Barangay kan  ciudad  nagsabi  na dakul na problema an dapat tawan nin prioridad sa barangay envez kan isyu sa tsismis, alagad kun ini an makaka-resolber sa naglalangkaw na reclamo sa mga tsismisan sa comunidad dai man siya macontra.

An poder kan consejo de barangay paghampangon an nagrereclamo asin pigrereclamo dawa ini isyu sa tsismisan kun dai ma-areglo pueding isakat an caso sa fiscalia na puedeng casohon nin libelo o kun dai man unjust vexation na mas magabat an multa asin penalidad na pueding ikonkon pa sa carcel an acusado kun maprobaran sa caso, sabi pa ni Sanchez.

Nagkaperang mga Barangay Council sa ciudad an nakakarecibe nin mga reclamo sa mga tsismisan, alagad mayo pa sa plano ninda na magpasar kan kaparejong ordinansa asin hinahalat muna an magiging desisyon kan SP.
                       (DPA)

 

Share on Facebook
Share on Twitter
Please reload