Comelec nag-aandam na kan Brgy., SK elections

January 25, 2018

Duwang veces nang nauktaba kan congreso an pigsarong Barangay asin Sangguniang Kabataan (SK) elections, alagad liwat nag-aandam an Commission on Elections (Comelec) sa nakatalaan na pirilian kaini  sa Mayo 14, 2018 mala ngani igwa nang calendar of activities base sa pinaluwas na resolucion numerado 10246.

Si Abogado Maico Julia Jr., election officer kan Comelec sa Ciudad nin Naga nagpahayag na sainda nang narecibe an Comelec resolution na nagtatalaan kan mga actividades kan mga opisina lokal nganing  amay nang  andaman an pirilian asin ipasabot sa publiko kan gigibohon na synchronized elections.

Ini sa tahaw kan posibilidad na mauktaba naman an pirilian mientras na prioridad kan congreso iyo an charter change sa pigtutulod na federalismo ni Presidente Rodrigo Duterte.

Alagad sinabi ni Julia na madagos man o dai an sinambit na pirilian sa Mayo 14 an Comelec magpapadagos  kan saindang preparasyon base sa pinaluwas na resolucion kan saindang opisina na firmado ni Acting Chairman Christian Robert S. Lim asin kan limang mga comisionado.

Huli kan duwang veces nang na-igilid an pigtalaan na pirilian sa barangay napalawig nin maabot na sa duwang taon an termino kan mga opisyales de barangay mantang padagos na mayo nang nagtutukaw na ex-officio member sa mga Sangguniang Bayan, Panlungsod asin Panlalalawigan na nagrerepresentar kan SK.

Puon sa Enero 26, Febrero 2, Febrero 7, Febrero 12, 13, Marso 15, Marso 30, igwa nang naka-calendaryong actividades mantang sa Abril 14 iyo an pagplantiar nin certifico de candidatura; election period puon Abril 14 hasta Mayo 21 asin an campaign period sa Mayo 4-12.  An pirilian sa maabot na Mayo 14, 2018.

Sa pagsikad kan election period prohibido na an mga minasunod;  pagdara nin badil asin mga patarum; paggamit nin bodyguards kan mga candidato; pagbalyo o pagdestino kan opisyal asin empleados kan gobierno kabali na an mga paratukdo sa escuelas publika; pagsuspendi kan mga elihidong opisyal kan provincia, ciudad, municipalidad asin barangay; pagbakal asin pagpabakal nin voto; asin pagkalap nin fondo sa paagi nin mga pabayle, pagpabulang, asin loterya.                                                        (dpa)













 

Share on Facebook
Share on Twitter
Please reload