Lalas pinalayas sa Casureco II

January 25, 2018

Sinikadan na kan junta directiva kan Camarines Sur II Electric Cooperative (Casureco II), si Project Supervisor/Acting General Manager Nelson  Lalas huli  sa  isyu  sa  loss  of confidence alagad an pamayo kan cooperativa nanindugan na dai pa siya mahali sa puesto sagcod na mayo pang kunfirmasyon sa resolucion an National Electrification Administration (NEA).

Sa  miting kan junta directiva kasoodmang Miercules, Enero 24 pinangenotan ni Director Jun Cornelio kan Naga North District an pagpasar kan resolucion na dapat halion na sa puesto sa Casureco II an acting general manager na pigsuportaran kan mayoria sa miembros kan junta na kinababalihan ninda directors;  Domingo Sancoco kan Pili District, Roberto Borja kan Bombon District, asin Jessie Delmoro kan Tinambac-Siruma District mantang an dai nagpabor sinda directors Gay Pabines kan Milaor District asin Nicanor Oriño kan Magarao District.

Kabali sa listahan ni Cornelio kun tano ta dapat nang sikadan sa puesto an PS/AGM iyo an mga minasunod;   1. Pag-abuso sa poder 2. An iba sa saindang mga resolucion dai inaaprobaran na mawot pang diktahan an saindang trabajo kun ano an dapat ilaag sa resolucion 3. Abalang aksyon nganing magkaigwa na nin linya nin telepono an cooperativa, 4. Mayong aksyon sa saindang gasoline allowance 5. Dai pag-designar nin Public Information Officer 6. Ferming napipinaran nin multa kan DENR an manijamiento 7. Bakong eficiente bilang project supervisor/acting general manager asin sa gabos na ini an kawaran ninda nin confiansa.

An director kan Magarao District hinahagad na dapat mag-orolayan na muna sinda Cornelio asin Lalas mantang an director kan Milaor District iyo an nagsusurog sa PS/AGM huli ta igwa man soboot nin mga naginibohan sa lado aspeto teknikal asin napahuros an system loss.

Nagpahayag man si Lalas sa atubangan kan mga miembros kan junta na pinamamayohan ni Paul John Sta. Ana kan Calabanga District, na dapat an mga reclamo ni Cornelio dapat sinumpaan asin tawan siya nin copya nganing makapaliwanag.

Saiya pang sinabi na hahalaton niya an kunfirmasyon kan NEA kun ano an magiging aksyon ni Administrator Eduardo Masongsong huli ta iyo an dapat magdesisyon.

Si Lalas, nag-asumir bilang project supervisor asin acting general manager kan cooperativa kan Marso 2017.

Sa lado ni director Sta Ana, sinabi kaini na bilang presiding officer dai na niya kinakaipuhan magparticipar sa vorotohan sa resolucion ni Cornelio alagad nagpaliwanag na an Casureco II bakong  ‘ailing cooperative’ na boot sabihon dai na kaipuhan an designadong project supervisor kan NEA, ini base sa Acta Republika 10531 na mas midmid sa apod na  NEA  Reform Act of 2013 asin nagtutubod siya na dapat sinudon an ley.

An Casureco II bakong bangkaruting cooperativa na declarado na kan NEA bilang double AA asin puede nang padalaganon kan permanteng general manager na dai na kaipuhan an tabang kan project supervisor, sabi pa kan pamayo kan junta.

Nagsimbag man an PS/AGM na sa presenting categorization nagtutubod an saindang opisina kan NEA na dai pa dapat halian nin project supervisor an cooperativa.

Sa kaparejong miting kan junta pigdesignar  na si Emmanuel Rojo na iyo an temporaryong magpugol bilang opisyal na parataram kan Casureco II na pigpaboran man kan pinapalayas na PS/AGM.

An cooperativa matapos magdemiter sa puesto bilang PIO si ISD Manager Rolando Pante, dai nagdedesignar si Lalas nin karibay apesar na pigrecomendar na kan junta na dapat ibalik si sinambit na puesto si Rojo.                                                                                                                                         (dpa)











 

Share on Facebook
Share on Twitter
Please reload