SA CAMARINES SUR: PET pig-isnab ni Marcos

January 25, 2018

Protesta vs Robredo posibleng ibasura, sabi

Apesar kan protesta ni dating Senador Ferdinand ‘Bong-bong’ Marcos Jr. sa resulta kan pirilian sa Camarines Sur kan nakaaging presidential election kan Mayo 2016, alagad dai nagpadara nin abogado asin dawa representante nganing maging testigos sa ginigibong inbentaryo asin paghakot kan mga horna nin balota nganing darahon sa Presidential Electoral Tribunal  (PET).

Aram kan campo ni Marcos an noticia kan PET na puponan kan Enero 23 an retrieval kan mga horna nin balota digdi sa Camarines Sur nganing darahon sa Corte Suprema para sa recounting alagad mayo saiyang pinadarang representante envez an presente iyo an grupo kan abogado ni Bise Presidente Leni Robredo sa paagi ni Atty. Maria Bernadette Sadillo.

An grupo kan PET nagpuon magtiripon kan mga horna nin balota sa Legislative Building kan Capitolyo Provincial gikan sa manlaen-laen na mga banwaan kan Camarines Sur kan Enero 23 asin tataposon sa Enero 26 nganing darahon sa SC.

An service truck kan Philpost iyo an matransportar kan 1,816 na horna nin balota asin books of voters asin darahon sa PET sa Manila.

Si Atty. Sadillo nagpahayag  sa miembros kan media sa Ciudad nin Naga na enot nang pigcuecuestion ni Marcos an intridad kan automated election system kan Commission on Election alagad an isyung ini ibinasura kan Corte Suprema kaya magkakaigwa nin bilangan nin voto sa resulta kan pirilian sa Camarines Sur, Iloilo asin Negros Orriental na pigsasabi kan dating senador na dinaya siya na nakaapekto sa resulta sa mga candidatong bise presidente.

                                                      PROTESTA POSIBLENG IBASURA
Dapat maprobaran na may substantial recovery nganing magpadagos an protesta na dinaya siya alagad kun daing prueba sa tolong mga provincias pa sanang ini sa viente cincong mga pigpoprotesta, ibabasura an saiyang protesta, sabi pa ni Sadillo.

Saiyang sinabi na nagtutubod siya na mayong nangyaring darayaan sa pirilian digdi asin mismo an taga Camarines Sur an pueding makatestigos asin si Robredo iyo an lihitimong bise presidente.

Sa resulta kan nakaaging presidential election an bise presidente nakakua 664,150 mil na voto contra ki Marcos na 41,219 mil voto.

Sa aktuwal na nakavoto kan nakaaging pirilian kan 2016 nagtotal sa 841,496 sa 1.8-milyon na rehistradong votantes sa Camarines Sur.  Sa 85 por cientong nakavoto an 83 por ciento nakua ni Robredo mantang si Marcos nakakua sana nin 5.3 por ciento.


VP ROBREDO TIWALA NA DAI MAGBABAGO AN RESULTA KAN ELEKSYON SA CSUR   

Nagtutubod si Bise Presidente Leni Robredo na dai na magbabago an resulta kan pirilian sa Camarines Sur mantang mismo an tawo digdi iyo makakatestigos kan nangyaring malinig na pirilian kan 2016.

Alagad an kawaran nin representante ni Marcos sa ginigibong retrieval kan mga horna nin balota igwang mawot sabihon.

Siya an naghagad asin nagpili na gibohon pilot an CamSur, siya an nagsabi na dakul testigos na igwang nangyaring sa resulta kan pirilian alagad mayo man.

Nagtutubod an bise presidente na gimmick sana asin may binibilog naman nin estorya si Marcos, kun interesado siya na magluwas an katutoanan taño ta dai nagpadara nin representante.

Siya an naghagad kaini, kaya presente an sakuyang abogado  sa  retrieval nganing maseguro na si hinahagad na proceso magiging malinig asin obligasyon niya na magpadara nin representante huli ta saiyang kagustohan, sabi pa kan bise presidente.                                                                    (DPA)



 

Share on Facebook
Share on Twitter
Please reload