Manga pag-uran, baha nagwalat P139.9-M na daños sa agrikultura

Pili, Camarines Sur - Huli kan halawig na mga aldaw nin pagbagonas nin uran epekto kan mga bagyong Urduja, Vinta, asin Agaton na bitbit kan duros amihan kan nagtalikod na bulan nin Deciembre 2017, maabot sa P139.9 milyon an total na danos sa produkto agrikultural sa Kabikolan, sabi kan opisina rehiyonal kan Departamento de Agrikultura (DA). Alagad an ahencia nagseguro nin ayuda sa mga apektadong mga paraoma sa paagi nin libreng hybrid seeds asin iba pang tanom na gulayon. Sa pinaluwas na listahan kan opisina ni DA Regional Executive Director Elena B. Delos Santos, kabali sa mga na-apektaran iyo an paroyan, maisan, mga tinanom na kamoting kahoy, asin HVCDP na igwang total na nagcacantidad nin P139,862,580.00, ini sa total na 17,286.01 na apektadong hektarya asin 11,839 na mga paraoma. An may pinakadakulang destroso iyo si mga tinanom na paroyan na apektado an abot sa 16,352.01 na hektarya asin 10,833 na mga paraoma asin igwang total na danos na nagcacantidad nin P130,816.080.00. Sa mga maisan apektado an 555 hektarya asin 555 mga paraoma asin igwang total na danos na nagcacantidad nin P3,462,500.00; sa mga tinanom na kamoting kahoy nagcacantidad nin P1,479,000.00 na apektado digdi an 207 hektarya asin 279 mga paraoma; sa HVCDP nagcacantidad nin P4,105,000.00 na apektado si maabot sa 169 mga paraoma sa tanoman na 169 hektarya. Sa Capitolyo Provincial kan Catanduanes, an Provincial Disaster Risk Reduction Council, na pinamamayohan ni Gobernador Joseph Cua nagrerecomendar sa Sangguiang Panlalawigan digdi na magdeclara nin state of calamity nganing matabangan an rinibong paraoma asin parasira na saro sa mayor na apektado kan maabot a 17 diyas na mga pagbulos nin uran epekto kan tropical depressions Urduja, Vinta asin Agaton, alagad nagsayuma sa kahagadan kan saindang jefe ejecutivo. An recomendasyon kan PDRRMC pinasar asin naaprobaran sa ginibong emergency meeting kan Deciembre 28, 2017. Bako lang sa lado nin produkto agrikultural an apektado alagad pati na an sunod-sunod na pagsuspendi nin klase sa mga pribado asin pampublikong escuelahan an naging aksyon kan mga jefe ejecutivo lokal. (DPA)