Lalas pinapahali na kan mga LGUs

February 1, 2018

Duwa nang lokal na gobierno  alagad igwa pang masunod na ibang LGUs sa sakop na mga distrito kan Camarines Sur II Electric Cooperative (Casureco II) Inc. an nagpasar  nin mga resolucion nganing suportaran  an  junta directiva kan cooperativa na dapat palayason na sa puesto si Engr. Nelson Lalas bilang Project Supervisor/Acting General Manager huli ta bako naman ‘’ailing’’ an cooperativang ini.

An LGUs sa Calabanga asin Bombon na sakop kan coverage area kan Casureco II magkasuhay na nagpasar nin resolucion na naghahagad sa National Electrification Administration (NEA) na bawion  na  an  nombramiento sa project supervisor/acting general manager na saindang pigbabasehan an Department Circular No. 2013-07 ‘’Prescribing the implementing rules and regulations of Republic Act 10531 na mas midmid na NEA Reform Act of 2013’’ Pigtawan ninda nin duon digdi na kun bako man ‘’ailing’’ an sarong cooperativa nin electricidad dai man kaipuhan na magdesignar nin PS/AGM.

Sa Sanggunian Panlungsod kan Ciudad nin Naga, sinabi ni Bise Alcalde Nelson Legacion na nakatalaan nindang imbitaran sa sesyon regular si Lalas bilang proceso nganing hagadan muna nin paliwanag  orog na sa isyu sa relokasyon kan mga poste sa road widening project kan DPWH alagad kun igilid sana an saindang imbitasyon dagos nang mapasar nin resolusyon nganing hagadon sa NEA na bawion na an saindang nombramiento. Hinahagad man ninda an presencia ninda board president John Paul Sta Ana asin Naga North District Director Angelino Cornelio.

An Casureco II iyo an pinakadakulang cooperativa nin electricidad sa Camarines Sur maging sa iba pang provincias kan Kabikolan asin sa ngonian declarado na kan NEA bilang double AA o buot sabihon kaini clasificado na nakaaangat na asin mayong  nang problema finansyal.

Kinumfirmar ni Bise Alcalde Ramoncito Robles kan Sangguniang Bayan kan Calabanga, Camarines Sur asin Alcalde Oscar Borja kan Bombon, CamSur na sainda nang pinarecibe sa junta directiva kan Casureco II an saindang mga resolucion.

Napag-araman igwa pang ibang LGUs an mapanday nin kaparejong resolucion nganing mapahali na si Lalas huli ta sagcod sa ngonian habo pang maghali dawa igwa nang resolucion an junta directiva na nagpapalayas sa PS/AGM huli sa isyu sa loss of confidence.

An dahilan sa pagkurapot  sa puesto ni Lalas iyo na kinakaipuhan halaton muna an kunfirmasyon kan NEA sa resulocion kan junta directiva. Siya midmid na NEA boy nagtutubod na dai pa napapanahon na halian nin project supervisor an Casureco II.

Sa resolucion kan duwang LGUs nagtutubod sinda na an padagos na pagtenir kan NEA boy dagdag sanang gastos kan cooperativa mantang padagos siyang nagrerecibe nin mga allowance asin iba pang benipisyo.

Si Lalas, pigdesignar bilang PS/AGM kan Marso 2017 karibay kan nagretirong  NEA boy na si Orlando Andres.

Nagtutubod sinda maninigo nang tawan nin considerasyon an saindang kahurotan kan NEA Board of Administrator na dapat bawion na an nombramiento ni Lalas.

Kaipuhan nang magtindog sa sadiri an Casureco II sa paagi nin pagbugtak nin permanenteng general manager, sabi pa.

An resolucion kan duwang LGUs pigpadarahan man nin mga copya si Presidente Rodrigo Duterte, Department of Energy Secretary Alfonso Cusi, mga pamayo kan Committee on Energy sa Camara-Baja asin Camara-Alta nganing saindang suportaran asin maggibo nin maninigong aksyon.         (dpa)



 

Share on Facebook
Share on Twitter
Please reload