NEA haloy mag-aksyon

February 1, 2018

Naaprobaran pa sana kan National Electrification Administration (NEA) an pigsumiter na cuentada kan Camarines Sur  II Electric Cooperative Inc.  sa gagastoson sa relokasyon kan ginatos na mga poste na apektado kan road widening project kan Department of Public Works and Highways (DPWH).

Antes nagpasar nin resolucion an junta directiva kan Casureco II sa pagpalayas sa puesto ki Engr. Nelson Lalas bilang Project Supervisor/Acting General Manager,  nagpahayag ini sa junta na aprobado na kan NEA an costing kan mga poste kan cooperativa nin electricidad na nagcacantidad P16.8 milyon para sa Ciudad nin Naga asin cantidad P5.5 milyon para sa Minalabac asin Milaor.

Sinabi kan PS/AGM na an saindang cuentada resulta kan saindang ginibong joint inspection kan DPWH asin Casureco II alagad pig-evaluar giraray ini kan NEA antes inaprobaran nganing an saindang ahencia iyo na an magsumiter kan costing sa opisina central kan DPWH.

Naghahalat nalang an manijamiento kan cooperativa nin electricidad kun nuarin mapaluwas nin fondo an DPWH.

AN Department of Energy (DoE) asin DPWH base sa saindang joint circular an obras publika iyo an magastos sa relokasyon kan mga poste na dapat mahali sa mga pig-iimplementar na road widening project alagad pigtawan nin plaso an mga cooperativa nin electricidad na dapat matapos an patrabajo sa relokasyon hasta sa Hulyo 31, 2018 asin kun dai ini magibo an Casureco II na iyo an may obligasyon sa gastos.

An report ni Lalas sa board meeting kan Casureco II dai man kaini pigdetalye kun igwa pang cuestion an DPWH sa cuentada sa gagastos sa relokasyon kan mga poste sa Ciudad nin Naga asin Calabanga, Camarines Sur.

Sinabi ni Assistant District Engr. Richard  Ragrario  kan 2nd Engineering District kan DPWH sa Baras, Canaman, Camarines Sur na sa saindang cuentada aaboton sana nin P10 milyon an dapat  gastoson sa relokasyon sa mga poste sa Naga pasiring sa Calabanga alagad sa sadiring cuentada kan Casureco II nag-aabot ini sa P16 milyon.

An mga documento  ibinalik sa Casureco II nganing patamaon an cuentada alagad dai maaramam kan obras publika kun nag-uyon an cooperativa.

Piglinaw kan DPWH na base sa joint circular an saindang ahencia mabayad sana sa orihinal na presyo kan poste alagad bako sa presyong ‘’upgraded’’.                                                                              (dpa)


 

Share on Facebook
Share on Twitter
Please reload