Naga andam na sa Palarong Bikol ‘18

February 1, 2018

Preparado na an Departamento de Edukasyon (DepEd) asin an lokal na gobierno kan Ciuadad nin Naga bilang presentador kan Palarong Bikol 2018 na paparticparan kan mga atleta hali sa anom na provincias asin pitong ciudades kan Bikol na masikad an karawat sa Febrero 3 sa paagi kan ceremonya alas 3:00 nin hapon na papangenotan ni Bise Presidente Leni Robredo bilang juespe de honor.

An pagbukas kan karawat gigibohon sa Metro Naga Sports Complex sa Barangay Pacol na aatendiran nin diez mil na mga atleta kaibanan an saindang mga coaches, team managers  gikan sa treceng division mientras na maabot sa cinco mil an maparticipar sa field demonstration kumpara kan Palarong Bikol 2016 na igwa sanang tres mil.

Sinabi ninda Alcalde John Bongat asin DepEd Superintendent William Gando kan Ciudad nin Naga na andam na an mga facilidades sa manlaen-laen na playing venues asin mga billeting centers sa quince mga escuelas publica.

Hasa na an ciudad sa mga preparasyon sa palaro mientras na duwang taon pa lang an nakakaagi iyo man an naging presentador kan 2016 asin kan nakaaging administrasyon ni dipuntong Alcalde Jesse Robredo perang veces na nagkaigwa kan kaparejong sports event sagcod na nagkaigwa pa digdi kan Palarong Pambansa.

Si Alcalde Bongat naglalaom na an contingent kan ciudad makakawikaw liwat an over-all champion, arog kan nangyari kan 2016.

Kan nakaaging taon 2017, an Ciudad nin Naga nag-ika duwa sa Camarines Sur, na solamente sarong bulawan na medalya sana an deferencia.

Sa Febrero 4 magkakaigwa muna nin solidarity meeting na an envuelto an opisyales kan Palarong Bikol 2018 nganing mapinalisar kan papandayon na mga reglamento sa manlaen-laen na sports event asin sa Febrero 5 iyo na an pagpuon kan mga karawat.

An gabos na resulta kan mga karawat iaapon sa Blue Room kan City Hall  sa paagi nin internet hali sa Metro Naga Sports Complex asin hali iba pang playing venues na kaipuhan munang i-validate an pinal na resulta na kukuanon kan miembros kan media.

Andam na an Communication Center sa City Hall na digdi iaapod an ano man na problema na kaipuhan ma-aksyon tolos kan ciudad.

Puon kan Enero 30 nag-arabotan na an ibang delegasyon mantang piglalaoman na completo na an gabos na atleta sa Febrero 1 asin yaon na sa mga billeting centers.

Kabali sa mga sports event iyo an minasunod; aero gymnastics, archery, arnis, athletics, badminton, billards, baseball. Basketball, boxing, chess, dance sports gymnastis,  football, futsal, sepak takraw, softball, swimming, table tennis, taekwondo, lawn tennis, volleyball, wushu, pencak silat, wrestling, goal ball asin volleyball girls.

An Bicol Medical Center asin an City Health Office nagpahayag naman kan saindang kaandaman ano man na emerhencia sa ngaran na salud kan mga atleta asin igwang preparadong mga ambulancia.

Afuera kan palaro ngonian na taon, an Ciudad nin Naga iyo an magiging presentador  ngonian na taon kan Private Schools Athletic Association (PRISAA) - Bikol sa maabot na Febrero 22 asin sa Hunyo ngonian na taon iyo an Batang Pinoy – Luzon Leg, sabi pa kan jefe ejecutivo kan ciudad.

Sa lado kan paz y orden an Naga City Police Office (NCPO) sa pamamayo ni City Director Sr. Supt. Jonathan Panganiban madestino nin mga pulis sa mga billeting center asin nag-andam na sa pagmangenir kan bulos trafico an Public Safety Office.       

Pakatapos kan Palarong Bikol 2018 an siisay man na magiging champion sa manlaen-laen na sports event iyo an marepresentar kan rehiyon sa gigibohon na Palarong  sa Abril 2018 sa Ciudad nin Vigan sa provincia nin Ilocos Sur.                                                                                                                      (DPA)   




 

Share on Facebook
Share on Twitter
Please reload