NFA nagsusuplay nalang bagas sa manga hospital kan gobierno

Pili, Camarines Sur – Apektado an suplay nin bagas kan National Food Authority (NFA) sa mga mercado sa Camarines Sur na dating cada semana nagdidistrubuer nin NFA rice sa mga tiendahan envez sa mga hospital na sana kan gobierno asin sa DSWD, alagad piglinaw kan ahencia na si rinibong sakong bagas saindang pigsuplay sa mga evacuees sa provincia nin Albay huli kan pagtuga kan Volkan Mayon. Sinabi ni NFA Assistant Provincial Manager Nora Follosco na puon pa kan Enero 25, 2018 sainda nang pinugol an distribusyon kasunod kan pinaluwas na direktiva kan saindang opisina central na pundohon na muna an saindang pagsuplay nin bagas sa mga mercado sa atubangan kan nangyayaring calamidad sa pagtuga kan Mayon sa Albay. Huli kaini, naging opurtunista an ibang mga negociante nin bagas sa Naga City Peoples Mall arog kan reclamo kan consumedores sa nagkaperang negociante digdi nagpalangkaw na nin sagcod sa cinco pesos cada kilo sa commercial rice na mayo man nagiginibong aksyon an Department of Trade and Industry (DTI) maging an Committee on Consumers Protection sa Sanggunian Panlungsod kan Ciudad nin Naga. Sa ngonian igwa na sanang 60 mil na sakong stock nin bagas an bodega kan NFA CamSur mantang enot nang naipaluwas si 22 mil na sakong bagas asin naghahalat pa sinda kan dugang na suplay na aangkaton kan gobierno sa nasyon kan Vietnam. Nagpaluwas man aviso an ahencia sa mga NFA rice retailers na mabuelta an saindang suplay nin bagas oras na mag-abot na an imported rice. Nagcierto an NFA na abunda pa an suplay kan mga commercial rice sa mga mercado mientras na dakul pa an stock kaini sa mga pribadong bodega nin mga negociante. An Camarines Sur iyo an tambubong nin bagas sa Kabikolan dawa na ngani nagkaigwa nin daños sa 16,352,01 hektarya sa mga kaomahan sa rehiyon huli kan halangkaw na tubig baha epekto kan halawig na mga pag-uran na bitbit kan nakaaging bagyong Urtuja, Vinta, asin Agaton, base sa datus na pinaluwas kan Departamento de Agricultura sa Bikol. An manlaen-laen na provincial office kan NFA sa Kabikolan kaparejo man an saindang pagsuplay nin bagas na prioridad ninda an maabot sa 80 mil na evacuees alagad sa huring osip kan Provincial Disaster Risk Reduction Council kan Capitolyo Provincial kan Albay si ibang evacuees pinapuruli na sa saindang mga residencia mantang nagkakalma na an pagpurongpusong kan Volkan. An consumedores duda man sa mga pahayag na ini kan NFA CamSur huli ta bako lang digdi nagkukulang na an suplay nin bagas envez sa iba pang mga provincia maging sa manlaen-laen na rehiyon sa Luzon. (dpa)