SA M.T. VILLANUEVA AVE., CIUDAD NIN NAGA: P59.8M road widening project popoonan na

Mga ulang na estractura tatapyasan Canaman, Camarines Sur – Dagos na an implementasyon kan road widening project kan M.T. Villanueva, Ave. (dating kalye Liboton) Ciudad nin Naga na tinagamahan nin P59.8 milyon kan Department of Public Works and Highways (DPWH) nganing ponan an patrabajo posibleng bulan nin Marso alagad kaipuhan munang radason an mga estractura sa gilid kan tinampo na nakalaog sa road right of way. Si Assistant District Engr. Richard Ragragio kan 2nd Engineering District kan DPWH sa Baras, Canaman, Camarines Sur nagkunfirmar sa Bicol Mail na saindang naisubasta an proyecto asin nagpaluwas na sinda nin notice to proceed nganing magsikad na an patrabajo sa panahon kan tag-init para mas marikas an patrabajo asin madaling matapos. Igwa na sindang noticia sa mga ma-aapektaran na concretong kudal, tiendahan, pribadong harong asin edificio kabali an sarong colegio na nakalaog sa sukol sa pagpahiwas kan tinampo. Kaipuhan eenforsar kan DPWH an ley na dapat magkaharali muna an mga ilegal na estractura antes mapunan an proyecto, sabi pa. Kabali sa hahagopon kan maabot sa sarong kilometrong road widening project iyo an mga gurangan nang kakayohan na sagcod sa ngonian pigcocontra pa kan ibang grupo nin environmentalist. Nagkaperang apektadong estractura an dai uyon na tapyasan an saindang propriedad, alagad an ahencia matagas an panindugan saindang iimplementar an proyecto asin ipapasunod an tamang road right of way nganing pahiwason sagcod veinte metros an lakbang kan tinampo. Babayaran kan gobierno an mga maliligis na propriedad kabali na an pagbalyo kan haloy nang isyu sa mga poste kan Camarines Sur II Electric Cooperative (Casureco II) Inc. Kan nagtalikod na administrsyon ni Presidente Benigno Aquino III, kabali sa pigtagamahan nin fondo kan DPWH iyo an road widening project kan M.T. Villanueva Ave. asin an kalabaan kan Concepcion Pequeña, Concepcion Grande, hasta sa Brgy. Del Rosario, alagad ibinalik an fondo sa national treasury huli kan mga pagcontra nin environmentalist group na puloton an kakahoyan na dakulang ulang sa implementasyon sa pagpahiwas kan national road, sabi man ni Consejal Vidal Castillo pamayo kan Committee on Infrastructure sa Sanggunian Panlungsod kan Ciudad nin Naga. Kun dai naging tagulnod sa DPWH an mga pagcontra sa pagputol nin mga kakahoyan haloy nang natapos an proyecto, sabi pa. An Sanggunian Panlungsod nagpasar na nin resolusyon na saindang pinapaboran an pagpurotol kan mga kahoy nganing daing ulang sa iimplementar na proyecto kan obras publika. (DPA)