HULI SA ILEGAL NA PAGDAKOP SA EMPLEADOS: Evenchance masangat caso vs envueltong mga pulis

February 19, 2018


Plano kan manijamiento kan Evenchance Gaming Corporation na magsangat nin caso kriminal contra sa mga miembros kan Pili Municipal Police Station sa Pili, Camarines Sur sa ilegal na pag-arestar sa mga empleado kaini sa ginibong pagsayada asin pagkumfiscar kan mga gamit sa pagbola kan Small Town Lottery (STL) na consideradong arbitrary asin illegal.
 
Ini an napag-araman kan PCSO Naga Branch sagcod nagdesisyon na dagos nang nagpundo kan saindang operasyon sa Camarines Sur dawa mayo pang  ‘’finality’’ an PCSO board resolution na cancelaron na an saindang awtorisasyon na magpadalagan kan STL digdi sa provincia.

Tinatawan nin limang aldaw an Evenchance Gaming Corporation matapos marecibe an resolucion kan Febrero 9, 2018 nganing magplantiar kan saindang motion for reconsideration asin hahalaton pa an pinal na desisyon.

 Si PCSO Branch Manager Jobeth Ramos nagpahayag man na ‘’prerogative’’ kan nagpapadalagan kan STL na magsangat  nin ano man na caso sa jusgado.

Sa 89 STL operation sa nasyon, solamente  an Evenchance digdi sa Camarines Sur an nagkaigwa nin controvercia asin kinacancelar an permit.

Sinabi ni Ramos an isyu contra sa Evenchance sa CamSur huli ta dai nagsusunod sa  tamang remiso  base sa contrata na dapat P61 milyon cada bulan alagad setenta por ciento sana an saindang pigreremiso na malinaw na dai pigsusunod an inaapod na presumptive monthly retail receipt.

Si Congresista LRay Villafuerte kan segundo distrito kan CamSur pigdara sa congreso an isyung ini  sagcod na naghampang an halangkaw na opisyales kan PCSO sa pamamayo ni General Manager Alexander Balutan.

Huli kaini, an junta nagpaluwas nin board resolution na kinacancelar an awtorisasyon sa Evenchance kan saindang operasyon kan STL digdi, alagad mayo pang finality na naging cuestionable sa operator an naging aksyon kan PNP na darakopon an saindang empleados asin pagkumfiscar kan mga gamit sa pagbola kan STL.

An PNP iyo an enot nakarecibe kan copyada kan board resolution alagad sa lado kan PCSO Naga Branch huri nang nakaabot sa sainda an copya.


Sa report  kan Pili MPS, veinte tres an saindang inarestar kaayon an duwang empleados kan PCSO alagad pinaruluwas man sana sa carcel huli ta mayo man sinangat na caso sa corte.

Inako kan sanga PCSO sa Ciudad  nin Naga  na plano na nindang maggibo aksyonan sa dai pagsunod kan Evenchance sa pangako kaini na mabayad kan tamang obligasyon sa PMRR alagad naenotan sinda kan congresista kan segundo distrito.

An STL sa Camarines Sur pigrereclamo kan mga LGUs huli ta apesar  mayong  mayors permit  nagpapadagos kan saindang  operasyon alagad  an Evenchance nagtutubod na dai na ini kaipuhan huli ta nagsusunod  sana sinda sa PCSO Charter base sa RA 1169 na dai na ninda kaipuhan na magkua pa kan sinambit na permit.  

Afuera pa kaini, pigrereclamo pa huli sa kawaran nin STL ID sa mga empleados na nagcocolecta nin taya asin ginagamit pang prontera sa ilegal na sugal na jueteng.



 

Share on Facebook
Share on Twitter
Please reload