Malacañan pigrarani sa tawo

February 19, 2018

Naglilibot an sekretaryo kan gabinete ni Presidente Rodrigo Duterte sa mga provincia nganing maparani an tawo sa Malacañan asin an Partido area kan distrito ni Congresista Arnulfo Fuentebella iyo an napili na pinakaenot na bisitahon kan Viernes, Febrero 9.

Si Press Secretary Harry Roque Jr., kaibanan an ibang miembros kan Presidential Management Staff (PMS) asin grupo kan Philippine Information Agency iyo an pinadara kan Malacañan na nag-atubang sa mga opisyales kan manlaen-laen na ahencia kan gobierno, opisyales lokal mantang igwa man suhay na miting sa Partido Development Administration (PDA) na presente si Congresista Fuentebella.

Bako lang pag-aram kan mga kaipuhan na proyecto  asin problema sa Camarines Sur na dapat ma-aksyonan kan Malacañan envez nagpaabot man nin report sa Press Secretary si Volcanologist Ed Laguerta sa pinakahuring kamugtakan kan pagtuga kan Volkan Mayon sa Albay.

Kabali sa actividad iyo an PIA Bicol asin Camarines Sur mantang nag-atubang man nin halipot na oras sa press briefing an sekretaryo kan gabinete.

Siya iyo an naging bisita sa regular board meeting kan Partido Development Administration (PDA), dagos nang pigpaliwanag sa saiya an operasyon kan Partido Water District, kamugtakan kan Partido State University asin Phil Science High School asin pagkatapos sa miting kan PDA board, ginibo an live Malacañan press conference.

Binisita ni Roque an ginigibong surgical mission sa Dr. Manuel  Fuentebella Memorial Hospital sa Sangay, Camarines Sur na perang decada nang programa sa salud kan mga Fuentebella.

Dakulang bagay sa kapobrehan an padagos na ginigibong libreng operation smile sa Partido district na dai na kaipuhan maggastos an magurang nin mga pasyente nganing  dai na magpasiring pa sa pribadong hospital envez dinadara na sa banwaaan asin mga dayuhan pang especialistang doktor an nagtatabang, sabi kan sekretaryo.

Sa enot na batch na nagconducir nin operasyon iyo an mga  Americanong especialistang doktor na pig-imbitaran kan congresista kan Partido area  asin sa ika-duwang batch mga especialistang doktor hali sa Espana.

  Antes nagbisita sa Partido area an press secretary nagcortecia muna ki Gobernador Migz Villafuerte sa Capitolyo Provincial sa Pili, Camarines Sur.             

 

Share on Facebook
Share on Twitter
Please reload