Propuestong aeropuerto sa Partido yaon na sa Malacañan

February 19, 2018

Kun pigcocontra kan ibang jefe ejecutivo sa ika-apat na distrito kan Camarines Sur an propuestong Partido Domestic Airport sa Barangay Pugay, San Jose, Camarines Sur alagad ipapaabot an proyecto sa Malacañan nganing makaayon sa Build, Build, Build program kan administrasyon ni Presidente Duterte kasabay na an plano na gibohon International Port an presenting Nato Port sa banwaan nin Sangay na pueding makalaog sa BBB.

An duwang darakulang propuestong  proyecto sa Partido area pigpresentar ni Congresista Arnulfo Fuentebella ki Malacañan Spokesperson Harry Roque kan ini magbisita sa ika-apat na congressional district kan nakaaging semana.

Alagad si Roque dai man nagsabi na saiyang iindorsar an propuestong aeropuerto para makabali sa BBB program ni Duterte envez ikokonsulta ki Sekretaryo Arthur Tugade kan Department of Transportation (DOTr) nganing kun ano an mga kaipuhan na dapat tawan prioridad.  Sa tataramon na tagalog arog kaini an detalye kan saiyang mensaje ‘’Ang aking pangako ay talagang ko-kunsultahin natin si Sec. Tugade, ipaparating natin yung pangangailangan, kasi siyempre ang prioridad ay kung ano ang pangangailangan, at ngayon po talaga ang prioridad ng gobyerno ay ‘’Build, Build, Build, at mukhang pasok naman sa criteria ng BBB, an parehong airport and seaport’’.

Si Roque, nagbisita sa ika-apat na distrito kan Camarines Sur kaibanan an mga opisyales kan Philippine Information Office haling central office, PIA Camarines Sur asin opisina rehiyonal digdi sa Bikol parte kan saindang programa na maparani an Malacañan sa tawo.

Pigkakarkulong aaboton sa P1.14 bilyon, an Partido Domestic Airport project na kaipuhan pang aprobaran kan NEDA Board na kun haen an Presidente iyo an na-preside mantang an proyecto nagcacantidad nin sobra sa P1 bilyon, segun sa opisina rehiyonal kan NEDA.

An sinambit na propuestong aeropuerto naging controbersyal huli ta iyo an natawan nin prioridad na makabali sa 2018 General Appropriation bill mantang dai na lugod natagamahan nin fondo an haloy nang plano sa pagpahiwas kan runway kan Naga Airport na namumugtak sa Pili, Camarines Sur.

Huli kaini, tolong mga congresista sa Camarine Sur nagkasararo nganing huroton sa House Committees on transportation and appropriations na magconducir nin inbestigasyon, ‘’in aid of legislation, nganing maaraman kun panong nakaayon sa 2018 General Appropriation bill an bagong proyecto sa aeropuerto envez nawalat na an Naga airport.

Sinda Congresista LRay Villafuerte kan segundo distrito, Gabby Bordado kan tercer distrito asin Salvio Fortuno kan ika-limang distrito nagplantiar kan House Resolution No. 1510 kan Deciembre 5, 2017 na hinahagad na magconducir nin inbestigasyon kun tano ta an Partido Domestic Airport Project, nakabali sa national budget sa 2018.

Sagcod sa ngonian dai pa maaraman kun igwa nang resulta an hinahagad na inbestigsyon kan tolong congresista sa Camarines sa duwang komite sa Camara-Baja.

Epekto kaini an sektor nin negociante  asin publiko nagdududa sa posibleng pagkaabala sa pagpahiwas kan Naga airport na enot nang pigtagamahan nin P3 bilyon kan nagtalikod na administrsyon Aquino alagad naabala sa presenting administrasyon Duterte.

Enot nang sinabi ni Jerold Peña, chief of staff ni Congresista Fuentebella asin designadog namamahala sa pag-monitor kan Partido Domestic Airport project na sainda nang isusumiter an feasibility study sa NEDA Board nganing maaprobaran.

Si DOTr Secretary Tugade nagseguro na nin cantidad P640-M para sa tolong taon na development project. Afuera pa kaini pigtagamahan nin enot na P40M kan DOTr an proyecto para sa land acquisition.




 

Share on Facebook
Share on Twitter
Please reload