PAGPAPUNDO KAN STL SA CAMARINES SUR: P7.41B nawarang ingreso sa gobierno, sabi kan PCSO

February 22, 2018

Nag-aabot na sa P7.41 bilyon an nawarang  ingreso para sa Philippine Charity Sweeptakes Office (PCSO), mga lokal na gobierno asin sa Philippine National Police (PNP) puon na mapundo an operasyon kan Small Town Lottery (STL) sa Camarines Sur kan Febrero 8 hasta ngonian na Febrero 22 o sa laog pa sana nin quince diyas.

An Evenchance Gaming Corporation na iyo an nagpapadalagan kan STL sa provincia nagplantiar na nin motion for reconsideration sa junta kan PSCO central office matapos cancelaron an saindang permit asin naghahalat pa kan pinal na desisyon.

An cuentada base sa tinataong kahirasan na cantidad P494 milyon aroaldaw para sa PCSO, LGUs asin Philippine National Police.

An sanga kan PCSO sa Ciudad nin Naga igwang P400 milyon na alokasyon aroaldaw para sa saindang flagship project sa mga naghahagad nin medical assistance sa saindang opisina na an nakikinabang bako lang pobreng residentes kan ciudad envez hali pa mga banwaan kan CamSur.

Alagad an PCSO digdi nagpapadagos man giraray kan saindang pagtao nin asistencia finansyal na an mga benipisyaryo iyo an tios na familia na may mga pasyente sa hospital.

Ini an mga pahayag sa Bicol Mail ni Branch Manager Jobeth Ramos kan PCSO sa Ciudad nin Naga matapos magdesisyon an Evenchance  na magpundo na muna kan saindang operasyon dawa na ngani mayo pang ‘’finality’’ an board resolution kan PCSO central office sa pagpapundo kan operasyon kan sinambit na juego.

Kan Febrero 8 iyo an ginibong pagdakop kan Pili Municipal Police Station sa Pili, Camarines Sur kan 23 na empleados kan Evenchance kaayon an duwang  empleados kan PCSO asin pagkumfiscar kan mga ginagamit sa pagbola kan STL huli sa directiva kan Capitolyo Provincial asin kan PNP Provincial Office kasunod kan pigsasabing board resolution sa pagpapundo kan STL digdi sa provincia.

An aksyon kan junta sa opisina central kan PCSO huli kan dai nagsusunod sa contrata an Evenchance na dapat magbayad nin P61 milyon pesos cada bulan para sa saindang obligasyon na inaapod na presumptive monthly retail receipt  (PMRR) envez nag-aabot sana sa 60 por ciento an saindang tinataong remiso o nagcacantidad sana nin P36.6 milyon.

Si Congresista LRay Villafuerte kan segundo distrito kan Camarines Sur iyo an nagcuestion sa congreso sa padagos na dai pagsunod kan Evenchance sa itatao sa gobierno kan tamang PMRR.

Afuera pa kaini, nagrereclamo an mga alcalde sa CamSur huli kan kawaran respeto sa mga lokal na gobierno sa pagsinutil na magkua nin business permit, nagiging prontera pa sa ilegal na sugal na jueteng an STL, kawaran nin IDs kan mga empleado na nagpapataya aroaldaw.

Sa 89 operasyon kan STL sa manlaen-laen na rehiyon, digdi sana sa provincia nagkakaigwa nin mga reclamo  na dagos nang pinapundo kan PSCO board.

Kun magkaigwa na nin pinal na desisyon contra sa Evenchance an PCSO mahanap nin ibang korporasyon nganing magpadagos an operasyon kan STL digdi, sabi pa.


 

Share on Facebook
Share on Twitter
Please reload