SA FREE IRRIGATION SERVICE ACT: 3 diputado sa CS kabali sa nag-introducer kan ley

February 22, 2018


Sa nagkaperang mga lehislador na  nagpadreno kan ley sa libreng patubig, tolong congresista kan Camarines Sur kabali sa naghiro asin co-authored nganing marealisar na an Free Irrigation Service Act na dai palang nahahaloy inaprobaran kan Malacañan.  
 
Sinda Congresista Gabby Bordado kan segundo distrito, Congresista LRay Villafuerte kan tercer distrito asin Salvio Fortuno kan ika-limang distrito gabos kan Camarines Sur kabali sa dakul na mga lehislador na padreno kan bill, kaayon an Ako Bicol party list Congressmen Alfredo Garbin asin Rodel Batocabe asin iba pa.  Si Senador Cynthia Villar, pamayo kan agriculture committee iyo man padreno sa Senado, co-authored si Senador Ralp Recto asin iba pang mga senador.

Yaon na an Free Irrigation Service Act alagad an mga benipisyaro iyo sana si nag-ooma nin walong hektarya pababa asin dai kabalI si mga operator kan corporate farms, plantation, fishpond asin iba pang non-agricultural crop, sabi kan National Irrigation Administration (NIA).

Sa entrevista kan Bicol Mail ki Congresista Bordado na saro sa co-authored, sinabi kaini na dakulang bagay sa sektor nin paraoma an libreng patubig nganing makabawas sa saindang ginagastos mala ngani dakul sa sainda an may mga   moroso sa irrigation service na dating pigsisingil kan NIA,

Si Ed Yu opisyal na parataram kan NIA Bikol nagsabi dawa dai pa nakakalusot sa duwang camara an libreng patubig sainda na ining pig-implementar  puon kan Enero 1, 2017 sa pagsunod sa pangako ni Presidente Rodrigo na dapat libre na an patubig sa mga paraoma.

Ini karibay kan inaprobaran na bill sa congreso na nagtatagama nin dos bilyon pesos para sa sueldo kan gabos na empleados kan NIA sa manlaen-laen na rehiyon.

Sa seksyon tres kan Acta Republika 10969 o an ‘’Free Irrigation Service Act’’ kabali digdi sa mga programa sa irrigation systems na pinaconstruhir, pigfondohan kan Department of Agriculture asin NIA maging kan iba pang ahencias de gobierno, asin  pinapadalagan kan organisasyon nin mga paraoma mantang si mga may moroso asin penalidad sa ISF dai na dapat bayaran, sabi pa ni Bordado.

   Kan nag-iimponer pa nin singil sa ISF an NIA sa cada sarong hektarya an paraoma nagbabayad nin limang cavan sa duwang aranihan asin kun mabayad nin cash cantidad P4,250 mantang P1,275 sa communal irrigation system.

Inaprobaran ni Presidente Duterte an RA 10969 kan Febrero 2, 2018 asin magiging epektibo an ley  quince diyas matapos ipublikar sa peryodiko nasyonal.                                                             (dpa)






 

Share on Facebook
Share on Twitter
Please reload