SP nagcrear TWG sa paghaman plano sa problema sa tubig baha

February 22, 2018

Si City Engr. Leon ‘Chito’ Palmiano iyo an tinukahan kan Sangguniang Panlungsod kan Ciudad nin Naga na pangenotan an pigcrear na Technical Working Group (TWG) na mapanday nin mga plano sa Comprehensive Drainage and Flood Control Masterplan sa ciudad asin tinawan sana nin panahon na taposon sa laog nin treinta (30) diyas matapos aprobaran an resolucion kan consejo.

Sa sesyon regular kan nakaaging semana pinangenotan ni Consejal Vidal Castillo, pamayo kan Infrastructure Committee an pagpasar kan resolucion na nagbibilog kan TWG nganing maggibo nin kumprehensibong plano sa desague asin flood control masterplan para mahanapan nin solusyon an problema sa baha kun nagkakaigwa nin halawig na pagbagunosan  nin uran siring kan nangyari kan ika-duwang semana kan Enero ngonian na taon.

 Kabali sa TWG iyo si Consejal Castillo bilang co-chairman, mantang an mga miembros iyo an City Planning Office, director rehiyonal kan National Irrigation Administration (NIA) sa Bikol, asin 2nd Engineering District kan Department of Public Works and Highways (DPWH).

An TWG pigcrear resulta kan pinaapod na conferencia ni Bise Presidente Leni Robredo kaibanan si Diputado Gabby Bordado kan tercer distrito kan Camarines Sur,  sa mga opisyales lokal kan City Hall asin LGU Canaman, Punong Barangay kan San Agustin, Canaman, District Engr. kan DPWH asin director rehiyonal kan NIA Bikol na pigtukar an isyu sa nangyaring hararom na tubig baha sa mga subdibisyon sa Barangay San Felipe asin Barangay Calauag huli sa raot na Irrigation control structure kan NIA na namumugtak sa Brgy. San Agustin na dapat gibohan nang solusyon an problema sa mga pagbabaha.

  Piglinaw kan consejal  na an resolucion nagtatao sana nin plaso sa TWG na dapat taposon sa laog nin treinta diyas an kumprehensibong desague asin flood control masterplan kasunod kan kahagadan ni Bise Presidente nganing isumiter tolos ki DPWH Secretary Mark Villar para matagamahan nin fondo an proyecto.

Sa privilege speech kan consejal antes pinangenotan an pagpasar kan sinambit na resolucion saiyang sinabi na nag-susubaybay palan an bise presidente sa nangyaring  tubig baha sa ciudad na saro sa pigreclamo kan consejal iyo an iyo an irrigation canal sa Brgy. San Agustin, Canaman na konektado sa waterway kan Barangay Calauag.    






 

Share on Facebook
Share on Twitter
Please reload