SA PROPUESTONG LEY SA CONGRESO: Pag-uktaba kan Barangay, SK elections tikapo na sa panahon

Titikapohon na sa panahon an congreso sa propuestong ley na liwat naman i-uktaba sa ika-tolong veces an Barangay, Sangguniang Kabataan elections mantang duwang bulan nalang pigtalaan na kan Commission on Election (Comelec) an pagrecibe kan mga masangat nin certifico de candidatura sa Abril 14 hasta Abril 20 asin an pirilian sa Mayo 14, 2018. Dakul pang mga pendienteng house bill an pigtatawan nin prioridad sa Camara-Baja asin an debate sa propuestong ley sa pag-uktaba kan pirilian makakaabaot pa sa senado alagad defende man giraray sa mayoriang miembros kan duwang camara. Ini an pagtubod ni 2nd District Congressman LRay Villafuerte kan mag-atubang sinda ni 5th District Congressman Salvio Fortuno parejo kan Camarines Sur, AKB Partylist Alfredo Garbin asin Davao City Congressman Karlo Nograles sa press conference na ginibo kan nakaaging Sabado, Febrero 17 sa CWC sa Capitolyo Provincial kan Camarines Sur alagad mayo pa sindang panindugan kun mapabor o contra sa pag-uktaba kan pirilian. Sa ngonian mientras na pendiente an propuestong ley asin mayo pang na-aaprobaran na ley dagos an nakatalaan na Brgy., SK elections base sa pinaluwas na Comelec Resolution No. 10246 na nagpapako kan mga actividades asin peryodo kan mga pinagbabawal sa sarabay na Brgy., SK elections, sabi pa. Sinabi man ni Congresista Nograles, pamayo kan House Committee on Finance and Appropriation sa Carama-Baja na igwang nakatagamang fondo sa sinambit na sarabay na pirilian sa Mayo 14 base sa aprobadong badget kan gobierno nasyonal ngonian na taon. Dai palang nahahaloy si Congresista Johnny Pimentel kan Surigao asin pamayo kan Commttee on Good Government and Public Accountability nagplantiar nin bill na dapat liwat naman igilid an sinambit na pirilian nganing tawan nin prioridad an planong pag-enmienda kan 1987 constitution sa pigtutulod ni Presidente Duterte na ribayan an presenting forma nin gobierno pasiring sa federalismo. Binasa na sa plenaryo o yaon pa sana sa first reading na maagi sa debate sa congreso sagcod na dadarahon sa senado. Sa lado kan mga opisina lokal kan Comelec nagpapadagos na sinda kan mga preparasyon sa pirilian asin mahalat sana sinda kan ano man na pinakahuring resolucion kun idadagos o liwat naman igigilid. (dpa)