Divorce bill pigcoconsulta na sa tercer distrito kan CamSur

March 1, 2018

An controvercial na divorce bill sa Camara-Baja dinara na sa masa ni Congresista Gabriel H. Bordado Jr. kan tercer distrito kan Camarines Sur nganing direktang consultahon an mga residentes kan barangay bako lang debatehan kan mga lehislador envez makua an pulso kan publiko nganing darahon niya sa congreso an voces kan distrito asin saiyang babasehan an resulta kan survey sa pagvoto sa propuestong ley.

Sa enot na consultasyon nagpaheling tolos nin pagcontra an mayoria sa 500 na residentes hali sa limang barangay kan Canaman, Camarines Sur na nag-atendir sa tiripon na isinasabay na kan congresista sa saiyang pigpapadrenohan na medical mission sa mga barangay na ginibo kan Sabado, Febrero 24 sa covered court  sa Poblacion, Canaman.

Igwa man nagpabor na Mrs. alagad hinapot ni Bordado kun tano ta nag-uuyon sa divorce bill an paliwanag huli ta perang taon na siyang suway sa esposo.

Hali sa mga barangay kan Tibgaw, Baras, Pang-pang, Sta. Cruz asin Dinaga, gabos kan banwaan nin Canaman, CamSur an nag-aaprovetsar sa medical mission kan congresista na digdi niya kinua si pagkakataon nganing ipaliwanag sa residentes an isyu sa divorce bill antes hinapot kun siisay an nagpapabor asin nagcocontra na nagvoces an mayoria contra sa bill na pigpapadrenohan ni Congresista Edcel Lagman kan Albay asin co-authored si House Speaker Pantaleon Alvarez.  

An kaparejong consultasyon ipapadagos ni Bordado sa saiyang paglibot sa tercer distrito kan Camarines Sur mantang piglalaoman na dadarahon na sa plenaryo an bill sa posibleng pag-enmienda asin pag-aprobar.

An saiyang mga staff sa District Office na pinamamayohan ni Ms. Glenda Dasco maconducir man nin survey afuera sa ginigibong consultasyon.

Sa entrevista kan Bicol Mail ki Alcalde Henry Ragodon na pusog nagcocontra sa bill asin presente sa medical mission asin consultasyon,  sinabi kaini kun nagcocontra an saiyang kahimanwa sa divorce bill huli ta sinda maka-dios, religioso, nagtutubod sa doctrina kan dios bilang catolico asin mga conserbatibo an tawo digdi.

An House committee on population and family inaprobaran na an pagsararo kan apat na bills na minatugot sa divorcio asin pagpawara nin saysay sa kasal kan mag-agom.

Kabali sa mga  nagpapadreno kan bill iyo sinda Congresista Ace Barbers kan Surigao asin an women’s group sa paagi kan Gabriela.

Sa propuesto ni Barbers kun an mag-agom limang taon nang nagsuwayan saro na ini sa isyu nganing pawarang bisa an saindang kasal, mantang an Gabriela pigtutulod na dapat enmiendahan an ibang porsyon kan Family Code.                                                                                                                                 (dpaureus)






 

Share on Facebook
Share on Twitter
Please reload