Naga, duwang aldaw nagrumdom kan People Power

March 1, 2018

Duwang aldaw an ginibong actividades sa Ciudad nin Naga sa paggirumdom kan ika-32 na anibersaryo kan Edsa People Power Revolution na pinonan kan Febrero 24 hasta 25 na magkasuhay pigcelebrar kan mga progresibo, militanteng grupo asin sa ika-duwang aldaw iyo an Eucharistic Celebration na pinangenotan ni Arsobispo Rolando Tria Tirona kan Archidiocesis nin Caceres.

An misa pigconducir sa St. Jude Thaddeus Parish Church sa Barangay Concepcion Grande na kabali sa mga nag-atendir sinda Bise Presidente Leni Robredo, Congresista Gabby Bordado kan tercer distrito kan Camarines Sur, Alcalde John Bongat kaibanan an mga opisyales lokal kan City Hall asin iba pang mga organisasyon civico asin ordinaryong namamanuan.

Sa mensaje ni Robredo tinawan halaga kaini na an People Power Revolution iyo an pagrumdom sa gabos na mga adal na naguno kan namamanuan Filipino na nagpabagsak kan diktadurang rehimin ni dipuntong Ferdinand Marcos.

  ‘’An aldaw na ini sarong paggirumdom na an poder  yaon sa kamot kan lambang Filipino asin bako sana sa gobierno, dapat  an  voces kan pigconducir na People Power Revolution, 32 nang taon an nakakaagi maninigo na isapuso aroaldaw tanganing dai mangyari na mautro an madiklom na istorya kan nasyon. Kinakaipuhan na labanan an siisay na maprobar na rauton an dignidad kan mga Filipino’’.

An paggirumdom kan People Power bako lang ginibo sa EDSA envez igwa man kaparejong actividades sa mga provincia nin Pampanga, Cebu, Pangasinan, Quezon asin iba pang ciudades asin provincia.

An Bise Presidente, pinili sa Ciudad nin Naga na digdi girumdomon nganing  ipaabot an pagcelebrar sa provincia bako lang nakacentro sa Metro Manila mientras na an People Power pinaglaban kan nasyon.

Sa lado kan mga progresibo asin militanteng grupo hali sa limang congressional district kan Camarines Sur nagkaigwa nin pag-martsa hali sa Bicol Central Station pasiring sa mga mayor na kalye kan centro kan ciudad sagcod nagtiripon sa Plaza Oragon.

Sa saindang hiro protesta, hinagad ninda na dapat  labanan kan namamanuan Filipino an diktadura na gobierno asin an pigtutulod na charter change kan administrasyon ni Presidente Duterte.

   Saindang pigdedenuncia an TRAIN Law huli ta mas lalong pinagabat an pagbuhay kan dati nang nagtitios na mga familia.                                                                                                                                 (dpa)          



 

Share on Facebook
Share on Twitter
Please reload