Campaña vs kurapsyon, droga misyon kan NBI

An campaña contra sa kurapsyon asin ilegal na droga afuera kan mga importanteng caso iyo ngonian an misyon kan National Bureau of Investigation (NBI) sa Camarines Sur na pinamamayohan ngonian ni Agent Incharge Dante Bonoan. Si Bonoan, na sarong Abogado asin CPA nagpahayag sa entrevista kan Bicol Mail na kabali sa saindang pigtututokan iyo an isyu sa kurapsyon na saro sa mga prioridad kan administrasyon ni Presidente Duterte na an mga envuelto digdi iyo an empleados asin mga opisyal kan gobierno. Dakulang bagay an cooperasyon digdi kan publiko sa pagtao nin importanteng impormasyon alagad daing gayo sinda digdi maasa envez magiging ‘’pro-active’’o masadiring misyon nganing maaraman an mga anomaliya sa paagi kan life style check. Ano man gigibohon nindang inbestigasyon laban sa arin man na envueltong opisyal o empleados kan gobierno bilang parejo sindang yaon sa gobierno dai dapat iconsiderar na sinda kalaban huli ta trabajo sana an saindang misyon, sabi pa ni Bonoan. Mismo an opisina central kan Department of Public Works and Highways (DPWH) nagpahayag na bukas an saindang ahencia sagcod sa mga engineering district nganing inbestigaran ano man na sahot o pagduda. Kaayon sa saindang listahan iyo an mga pig-iimplementar na mga proyecto kan lokal na gobierno, Departamento de Edukasyon asin iba pang ahencias de gobierno asin hagad kan NBI an cooperasyon kan comunidad nganing makatabang sa campañang ini ni Duterte. Sa campaña laban sa droga, an Philippine Drug Enforcement Agency (PDEA) na enot nang inako na dai ninda kayang magsulo kaya ngani pigbuelta ni Presidente Duterte na maging katuwang an Philippine National Police asin masuporta pa digdi an NBI. Sinabi pa ni Bonoan na andam sinda na maging katuwang kan PDEA sa ano man na operasyon laban sa ilegal na droga maging kan mga lokal na gobierno na igwa man mga hinaman na plano asin programa sa pagresolberan kan problema sa droga. An NBI pueding maglansar nin operasyon sa ilegal na droga alagad maninigo na mag-aviso man giraray sinda sa PDEA bilang iyo an ahencia na nangengenotan sa campaña sa droga. An problema sa droga haloy nang nagdadanay dawa padagos an operasyon an mga awtoridad laban sa ilegal na actividad na ini alagad importante an pagtabang kan comunidad. Dinagdag pa kan bagong pamayo kan NBI Camarines Sur na nagdestino na siya nin mga agent na mapugol kan mga caso na dapat tawan prioridad. (dpaureus)