Andaya, segurista sa laban

March 8, 2018

Segurista sa laban, may sekretong alas sa politica asin orihinal na kaalyado kan PDP-Laban na iyo an partido ni Presidente Rodrigo Duterte. Ini an pagtubod kan dating congresista sa Camarines Sur kasunod kan amay na deklarasyon ni Diputado Rolando Andaya Jr. kan premir distrito na macandidato siya bilang gobernador sa maabot na pirilian sa Mayo 2019.

Si dating Alcalde kan Ciudad nin Naga asin Congresista Sulpicio ‘Cho’ Roco Jr. kan dating segundo distrito kan Camarines Sur na miembro kan PDP-Laban sa provincia nagpahayag  sa entrevista kan Bicol Mail na dai ma-anunciar si Andaya kan saiyang ambisyon sa politica kun mayong pag-aadal asin consultasyon sa mga lideres political kan limang distrito.

Dai mabuntog sa laban contra sa nakatukaw na Gobernador Migz Villafuerte kun mayong kasegurohan sa nagdadangadang na pirilian, sabi pa.

An diputado kan premir distrito nag-deklara na kan saiyang pagcandidatong  gobernador  kasabay kan saiyang pigpadrenohan na medical, dental and optical mission sa covered court kan Lunes, Marso 5 sa Pili, Camarines Sur na presente an saiyang mga lider sa politica digdi sa pamamayo ni Alcalde Tomas Bongalonta asin hali pa sa ibang congressional district kan Camarines Sur.

Kan nakaaging  Marso 3, si Andaya nakihampangan sa mga opisyales lokal asin lideres political sa Partido area sa pamamayo ni Congresista Arnulfo Fuentebella na ginibo sa Abo Farm, Tigaon, Camarines Sur na nagpahayag nin bilog na suporta sa candidatura kan congresista kan premir distrito para sa maabot na pirilian lokal sa Mayo 2019.

Nagpahayag man nin kaogmahan si Alcalde Bongalonta huli ta ginibo sa saiyang banwaan an amay na kunfirmasyon ni Andaya na macandidatong gobernador mantang  an Pili iyo an kabesira kan provincia asin yaon digdi na mumugtak an Capitolyo Provincial.

 Labi-labi an sakuyang kaogmahan ta digdi ginibo ni Andaya an saiyang pag-anunciar nin candidatura sa provincia, alagad namumundo  huli ta apesar na yaon sa saindang banwaan an Capitolyo Provincial mayo sindang naheheling na pueding i-orgulyong acomplisimiento kan presenteng administrasyon kan provincia, sabi pa ni Bongalonta.

Sinabi pa ni Andaya na mabugtak siyang completong mga candidato sa provincia, mga congresista, alcalde, bise alcalde asin consejales sa  gabos na munisipyo kan Camarines Sur.

Sa lado ni Congresista LRay Villafuerte (NP) kan segundo distrito kan Camarines Sur asin ama ni Gobernador Migz, nagpahayag sa media na mas marhay magcandidatong  gobernador si Andaya nganing ma-icompara ninda an acomplisimiento kan diputado lalo na kan siya iyo pa an congresista kan dating premir distrito.

An amay na hiro kan mga politico para sa masunod na pirilian lokal huli ta piglalaoman na liwat matalaan nin calendar of activities an Commission on Election na dapat an paglantiar nin certifico de candidatura sa enot na semana kan Oktubre 2018 arog kan mga ginigibo kan mga nakaaging eleksyon. (dpa)

  
 

Share on Facebook
Share on Twitter
Please reload