SA CALABANGA INFIRMARY HOSPITAL: Leni naka-solicit hospital equipment sa New York

Tanganing macompleto na an mga hospital equipment kan Calabanga Infirmary Hospital sa Brgy. Paolbo, Calabanga, Camarines Sur si Bise Presidente Leni G. Robredo nag-solicit na sa ibang nasyon sa tabang kan grupo nin mga Filipino alagad magkakaigwa muna nin fund raising para sa pagtransportar kan ekipahes pasiring digdi sa Filipinas. Sinabi kan Bise Presidente na saiya nang nakaolay an organisasyon nin mga Filipino sa New York na nakakua na kan mga ekipahes kan hospital alagad huli kan dakulang gagastoson sa transportasyon, an grupo nagtalaan nin fund raising sa Mayo 19, 2018 nganing makatipon nin fondo. Piglalaoman na sa bulan nin Hulyo o Agosto 2018 makakatipon na nin fondo sa pagtransportar mantang nagtatarabangan an mga Filipino sa sinambit na nasyon na saiyang hinahagadan nin tabang para macompleto na an mga laboratoryo asin ekipahes nganing maging full operation na an infirmary hospital na haloy nang natapos an construksyon. Narealisar an Calabanga Infirmary Hospital kan an bise presidente iyo pa an congresista kan tercer distrito kan Camarines Sur mantang an Capitolyo Provincial kan Camarines Sur sa pamamayo ni Gobernador Migz Villafuerte iyo man an nag-asegurar nin fondo para sa pansueldo sa mga doctor, nurses, asin empleados kan hospital. Si Robredo, na bakong kaalyado kan administrasyon Duterte dai na naghagad nin tabang sa gobierno nasyonal envez sa paagi kan saiyang pag-soliciit sa organisasyon nin mga Filipino sa New York iyo na an saiyang hinagadan nin tabang. Kan mga nakaaging bulan si Robredo, Gobernador Migz, Villafuerte, 3rd District Congressman Gabby Bordado, Department of Health (DOH) Bicol, Provincial Health Officers kan Camarines Sur asin opisyales lokal kan Calabanga nag-orolay nganing hanapan nin solusyon na mapadali an pagbukas kan hospital na dakulang bagay sa mga pasyente digdi na dai na kaipuhan magdalagan sa Ciudad nin Naga. Kan Viernes, Marso 2, 2018 an cuarenta y otso (48) na mga kapitanes de barangay asin barangay kagawad pig-miting na kan Provincial Health Officer nganing inpormaran sinda na an operasyon kan infirmary hospital para sana sa out patient mientras na kulang pa an mga facilidades asin ekipahes. Presente sa orolay iyo an mga opisyales lokal sa pamamayo ni Alcalde Eduardo Severo na matabang an saindang LGU asin yaon man si Congresista Bordado na nagpangako iyo na an mapacemento kan tinampo palaog sa hospital. An infirmary hospital na may distancia na sa centro kan banwaan tuyong binugtak sa Barangay Paolbo nganing maparane sa mga residentes na yaon sa hararayong barangay envez na mag-viaje pa pasiring sa mga hospital sa Ciudad nin Naga. (dpa)