Divorce bill dapat iconsulta sa publiko

March 15, 2018

Aramon an opinyon kan tawo nganing iyo an maging desisyon sa pagvoto sa isyu kan divorce bill sa congreso, tama an mga ginigibong consultasyon sa tercer distrito kan Camarines Sur ni Congresista Gabriel H. Bordado Jr. na dapat  iyo man an i-adaptar sa ibang mga congressional district nganing darahon an voces kan distrito sa congreso.

Ini an mga pahayag sa Bicol Mail ni Pastor Dan Andres kan Evangelical Church (United Church of Christ in the Philippines) asin pamayo kan Camarines Sur Ecumenical for Justice and Peace matapos makalusot na sa House committee on population and family an pagsararo kan apat na bills na minatugot sa divorce asin dissolution of marriage nganing tawan nin buelo an mga ribokado nang mag-agom alagad magiging magian na an gagastoson sa proceso legal kan caso.

Sa paglibot-libot ni Bordado sa nagkapera nang mga banwaan kan saiyang sakop na congressional district nagcoconducir na siya nin consultasyon na an resulta mayoria man giraray an nagbabasura kan divorce bill bilang mga catolico asin pigtatawan duon an sagradong kasal sa simbahan.

An voces kan tercer distrito kan Camarines Sur sa divorce bill iyo an babasehan ni Bordado sa pagvoto sa propuestong ley.

Alagad sinabi pa ni Pastor Andres dapat sa mga consultasyon kaipuhan ilinaw fermi an kasagradohan kan kasal ta maski kaidtong  haloy nang mga panahon pinapahalagahan kan mga Filipino an saindang kasal sa atubangan kan Dios.

‘’Sa ibang nasyon dai na sinda naghahalaga kan kasagradohan kan kasal aram ta yaon ini sa biblia, alagad kitang Filipino pigtukdo asin pig-adalan napakararom kan kasagradohan kan kasal sa Dios’’.

Sinabi pa kan Pastor na sindang mga Protestante contra sa divorce bill huli ta saindang pinaninindugan nin maigot an kasagradohan kan kasal dawa na ngani  igwa kitang legal separation asin annulment .

  Saiya pang dinagdag na duda sinda sa lakdang kan presenteng administrasyon ni Presidente Duterte sa pigtutulod na charter change nganing bagohon naman an ley sa pagkasal.

An mayo pang numbered na substitute bill may titulong An Act Providing for Absolute Divorce and Dissolution of Marriage, segun sa principal author Diputado Edcel Lagman kan Albay mantang si House Speaker Pantaleon Alvarez iyo man an co-author kan bill.

An pigsararong House Bills 116 ni Lagman, 6027 (dissolution of marriage) ni Alvarez, 1062 ni Surigao del Norte Congressman Robert Ace Barbers asin 2380 kan grupo nin kababaehan na Gabriela an nakatalaan isunad sa plenaryo sa posibleng pag-emienda asin pag-aprobar.                                             (dpaureus)        




 

Share on Facebook
Share on Twitter
Please reload