Pambabadil sa lider kan kumunista “shootout”- CPP

March 22, 2018

‘’Shootout’’ an nangyaring pambabadil sa sekretaryo kan Bicol Regional Party Committee kan  Communist Party of the  Philippines  sa  Barangay Cararayan, Ciudad nin Naga sa ginibong operasyon kan 9th Infantry Division kan Philippine Army asin kan Naga City Police Office kan Marso 16 nin banggui.

Ini an pinaluwas na press statement kan information bureau kan CPP bilang saindang reaksyon sa pagkakagadan sa saindang lider na si Alfredo Merilos alias Ka Owen na segun sa sainda an envuelto sa shootout mga miembros kan militar asin nagkaperang miembros kan NCPO.

Nakadamay iyo an saiyang kaibanan na si Liza Beriso Ocampo, na dai palang nahahaloy balik bayan bilang OFW hali sa Dubai alagad an sadiring tawo kaini duda sa nangyaring pagkakabadil sa victima.

Si Ocampo iyo an kagsadiri kan harong na temporaryong pig-eestaran ni Fajardo mantang ini nagpapabulong sa doctor sa Ciudad nin Naga.

Sinabi pa na yaon digdi sa ciudad si Ka Owen huli ta nagpapabulong sa doctor matapos magsapo  nin mild stroke perang semana na an nakakaagi. ‘’It is highly doubtful that Merilos, in his condition, could engage in any sort of firefight with a combined military and police force’’

Base pa sa inpormasyon kan CPP, si  Merilos mayong armas kan siya mag-bakasyon nganing magpabulong mantang si Ocampo marhay na tawo inapod pa nindang ‘’good samaritan’’ na nagtataong  may maestaran an victima sa tabang kan saiyang amiga o amigo mientras na may kamatian sa salud.

An pang-gagadan ki Merilos nagluluwas na assassination operations kan AFP asin PNP na ginamit na dahilan an pagserbe kan mandamiento de aresto, sabi pa kan CPP.

Sa lado kan 9th Infantry Division kan Philippine Army na may base sa Camp Elias Angeles, Pili, Camarines Sur ipinahayag na mayong katutuanan an mga akusasyon kan CPP huli ta lihitimong an saindang operasyon.

Ini an mga pahayag ni Capt. Joash Pramis, opisyal na parataram kan 9th ID asin nagtutubod siya na ginibo sana kan mga awtoridad an saindang trabajo sa pagserbe kan mandamiento de aresto alagad nagprobar na maglaban kaya napiritan na paputokan an lider kan CPP asin an saiyang kaibahan na babae.

Piglalaoman na kan 9th ID na mapaluwas nin sadiring mga alegasyon an kampo kan CPP contra sa AFP asin PNP, sabi pa ni Pramis.                                                                                                             (dpaures)  



 

Share on Facebook
Share on Twitter
Please reload