LGU Libmanan pupotolan suplay corriente kan Casureco 1

April 5, 2018

Libmanan, Camarines Sur –  Delicadong magkarapkarap sa kadikloman an lokal na gobierno digdi asin an centrong mga barangay na binabayadan an consumo nin corriente an mga street lights kan LGU oras na estrictong implementar kan Camarines Sur I Electric Cooperative (Casureco I) an notice of disconnections ano man na aldaw ngonian na semana.

An notice of connections narecibe kan LGU kan nakaaging Lunes, Abril 2 asin matatapos na si tinaong plaso ngonian na aldaw  alagad kun magpalyar an lokal na gobierno na makabayad kan saindang moroso sa February 2018 electric bill na igwang total na P375,307.51 madadagosan na putolan suplay nin corriente.

An sinambit na total na babayadan sa consumo sa corriente kinababalihan kan linya sa LGU na nagcacantidad nin P259,627.95 asin sa mga street lights flat rate nagcacantidad nin P115,679.56.

An manijamiento kan Casureco I na pinamamayohan  ni General Manager Ana Sylvia M. Alsisto midmid na estrictong nag-iimplementar kan dapat maputolan  nin suplay nin corriente dawa siisay man na personalidad, LGU asin dakulang negociante na sakop kan cooperativa kun dai tatao magbayad kan saindang obligasyon mala ngani perang taon nang 100 por ciento an saindang collections efficiency.

Igwang fondo an LGU sa pambayad sa electric bill alagad an problema huli ta poon kan Marso 6, 2018 duwa na an alcalde digdi na cuestionable sa bangko an pagpaluwas nin cuarta asin pagpirma sa tsikie kun siisay an dapat midmidon na lihitimong jefe ejecutivo.

Huli sa isyu sa duwang alcalde mayong nagpipirma kan tsikie asin dapat ngonian na Juevez, Abril 5 iimplementar na an disconnections. Helingon ko  if  they  will  come  up with arrangement, sabi ni GM Alsisto.

 Nagkaigwang isyu sa duwang jefe ejecutivo digdi matapos castigohon kan Capitolyo Provincial kan Camarines Sur nin anom na bulan na suspension si Alcalde Bernard Brioso huli sa caso administrativo alagad  nagpapadagos sa puesto sa dahilan nagsangat pa siya nin motion for reconsideration.

Sa lado ni bise alcalde Romel Bulaong iyo man an nag-asumir bilang acting mayor sa pagtubod niya na dapat naghelig sa opisina si Brioso mantang suspendido ini kan Capitolyo Provincial.                  (dpa)




 

Share on Facebook
Share on Twitter
Please reload