Limang eskursiyonista nalamos kan Semana Santa

April 5, 2018

Sunod-sunod an magkasurohay na mga insidente nin pagkakalamos  sa mga beach resort nin limang mga persona  na kadakli jovenes kan nakaaging Semana Santa sa Bikol.

Sa pinaluwas na listahan kan Bikol PNP sa Ciudad nin Legaspi an enot na pig-report sa sainda iyo an nangyari kan Marso 26 alas 3:50 nin hapon sa Twin Rock Beach Resort, sa Barangay Igang, Virac, kan Islang provincia ni Catanduanes.

An biktima nginaran na si Jayhard Dela Rosa y San Juan, 17 años, residente kan banwaan nin Pandan, Catanduanes.

Ika-tolong aldaw,  Marso 29 nagsunod naman an kaparejong insidente  kan makuang lamos na sa beach resort sa Brgy. Caloco, Tinambac, Camarines Sur si Oscar Vargas Jr. y Sato 25 años, taga Sona cuatro, Barangay Lupi, San Fernando.  An beach resort digdi dinadayo na kadakli nin lokal na mga turista maging mga nagbabakasyon na dayuhan.

Nagsunod man kan nakaaging Sabado de Gloria, Marso 31 base sa pinaabot na report kan Kabalikat Civicom, Pasacao Chapter an saro naman na biktima nag-eedad siete años na aking lalaki, nalamos sa Balogo Beach Resort sa banwaan nin Pasacao.

   Pakatapos kan insidente sa Tinambac asin Pasacao gabos digdi sa Camarines Sur aldaw nin Paskong Pagkabuhay ni Jesucristo, Abril 1 saro naman na pigbistong  si Samuel Garcia y Gallorca, 27 años asin taga Barangay Manga, banwaan nin Sipocot nalamos man sa beach resort digdi.

An biktima kaibanan an saiyang familia nagkakaigwa kan saindang excursion sa resort  alagad biglang sinampaling nin makusog na alon nin dagat.

Pigtarabangan pang isalbar kan ka-familia sagcod na dinalagan sa Bicol Sanitarium Hospital sa Cabusao, Camarines Sur alagad binawian nang buhay.

Kan kaparejong Paskong Pagkabuhay, si Ashley Atanacio y Beatriz, 12 años kan  Barangay Tacbong, Pili, Camarines Sur, nalamos man sa Tikling Island Beach Resort sa Calintaan, Matnog, Sorsogon. An biktima asin an saiyang amigo, na si Janine Kate Maclang parejong nag-iibanan sa paglangoy kan aboton sinda nin makusog na alon nin dagat sagcod na nakarayo sa resort. Dinalagan pa sa hospital an biktima alagad binawian na nin buhay mantang nakasalbar si Maclang.

   Mientras tanto, si Police Senior Superintendent  Jerry Bearis, Acting Provincial Director kan PNP Provincial Office sa Camarines Sur nagsabi na heneralmente naging matuninong si panahon kan Semana Santa alagad namumundo siya huli ta kadakli kan mga biktima nin nalamos nangyari digdi sa provincia.

Ngonian na panahon nin bakasyon asin tag-init nag-apelo si Bearis sa gabos na mga ma-excursion sa beach resort kinakaipuhan na maglikay mantang an maysadiri kan mga resort pinatanidan na dapat  ferming preparado asin completo an saindang facilidades sa ano man na emerhencia.





 

Share on Facebook
Share on Twitter
Please reload