NFA Camarines Sur naubusan stock nin bagas

April 5, 2018

Pili, Camarines Sur -  Matapos magkulang-kulang an suplay nin NFA rice sa mga mercado asin retailers kaini sa Camarines Sur kan bulan nin Enero 2018 alagad sa ngonian naubosan na nin stock nin bagas an bodega kan National Food Authority digdi sa provincia.

Kinumfirmar ni Assistant Provincial Manager Nora Follosco na si dati nindang 60 mil na sakong stock nin bagas na iyo an pigdidistrubuer sa mga mercado, BJMP, hospital, asin DSWD kan mga bulan nin Enero, Febrero asin Marso alagad sa ngonian tinangating na sinda sa suplay nin NFA rice.

Mayo pang nag-aabot nin imported rice na pigdudoong sa provincia nin Albay asin naghahalat sana sinda kan aksyon kan saindang opisina central.

 Apektado an ahencia kan mga pribadong comprador huli ta nagbabakal sinda nin halangkaw na presyo nin paroy sa mga paraoma na nagcacantidad nin P19 hasta P20 cada kilo mantang an saindang opisina nakapako sana an presyo sa P17. Afuera pa kaini, kun alang nang paroy binabakal pa kan pribadong sektor sa cantidad na P23 hasta P25 cada kilo.

Kan panahon ni DA Secretary Alcala, an bodega kan NFA Camarines Sur pano-pano nin stock nin bagas na lokal na produkto huli  ta an mga paraoma digdi sa provincia nagpapabakal kan saindang inaning paroy sa NFA alagad sa ngonian dawa igwa pa sindang fondo sa palay procurement dai na nakakabakal paroy hali sa paraoma.

Abunda kuta si lokal na produkto  nin bagas kan NFA Camarines Sur sagcod na  mayo   nang imported rice alagad dai nahaloy luway-luway nagkukulang  kaidto an saindang nababakal na paroy mantang naglangkaw na si presyo sa pribadong negociante.

An hababang presyo kan NFA rice iyo man an nakakapugol sa paglangkaw kan presyo sa commercial rice na mayormenteng apektado an pobreng consumedores.                                              (dpa)



 

Share on Facebook
Share on Twitter
Please reload