RD kan DPWH pinaparetiro na

April 19, 2018

Dapat magretiro na nin amay sa serbisyo sa gobierno si Engr. Danilo Versola, regional director kan Department of Public Works and Highways (DPWH) sa Bicol huli kan mga reclamo sa mga proyecto sa infrastractura envez na maghalat pa kan apat na bulan kan  saiyang nakatalaan na compulsory retirement.

Ini an  pinaabot ni Presidential Adviser for Bicol Affairs (PABA) dating RTC Judge Marvel Clavecilla ki assistant regional director Esmeraldo Sarmiento sa pinaapod kaining miting sa DPWH Bicol, 2nd District Engineer District sa CamSur asin Camarines Sur II Electric Cooperative (Casureco II) na ginibo sa board room kan cooperativa dai palang nahahaloy na mayor na pigtukar sa orolay an isyu sa abalang relokasyon kan mga electrical post asin proyecto sa infrastractura.

Natuyawan kan PABA an mga sub–standard na proyecto sa infrastractura kan DPWH sa Camarines Sur arog kan permi nalang na pighihirahay na labot na San Jose Bridge sa Pili, Camarines Sur apesar na dai palang nahahaloy natapos an proyecto alagad nalabot na naman arog kan nangyayari sa Baraca Bridge sa banwaan nin San Fernando,  dai matapos-tapos na re-blocking project sa Andaya Highway na haros bulan-bulan sige an patrabajo na nagiging causa nin aksidente sa trafico mala ngani pigrereclamo an gurobot na bulos nin trafico sa San Isidro, Libmanan, CamSur.

Digdi sinabihan ni Clavecilla si ARD Sarmiento na napag-araman kaini, apat na sanang bulang maretiro na sa serbisyo si Versola na dapat dai na halaton an apat na bulan mas marhay pang amayan na an saiyang pagreretiro.

  Binabasol digdi an mga sub-standard na patrabajo kan contractor asin dapat i-blacklist na sinda sa pagcontrata nin mga proyecto sa DPWH, sabi pa ni Clavecilla.

Sinabi man kan opisyal kan DPWH Bicol na igwa na sindang  ginigibong proceso contra sa mga pasaway na contratista na kaipuhan man giraray mag-agi sa due process antes mag-aksyon alagad sinabi pa kan PABA gurano kahaloy an ‘’due process’’ helinga an San Jose Bridge?

Pinatanidan pa kan PABA an DPWH sa paagi nin tataramon na english na an isyu sa kurapsyon is not merely corruption of money but also incompetence and efficiency that is cover by corruption

 Si Clavecilla asin an chairman kan Presidential Anti-Crime Commission (PACC), Commodore Dante Jimenez igwa nang coordinasyon sa campaña laban sa kurapsyon na saro sa prioridad kan administrasyon ni Presidente Duterte.

Sa sinambit na miting presente si Atty. Bon Naval kan PACC asin iba pa kaining pag-iriba asin si Tommy Lee na saro man sa opisyal kan PABA.

Hinahagad na kan PABA asin PACC an mahibog na libro nin listahan kan mga proyecto sa infrastractura kan DPWH ngonian na taon nganing saindang ma-monitor.

  Pig-osipon ni Clavecilla ki Sarmiento asin Assistant District Engr. Ricky Ragragio kan 2nd Engineering District kan DPWH  Camarines Sur na presente sa sinambit na orolay na kaayon sa dakulang mga proyecto kan administrasyon Duterte iyo an 300 kilometros na Bicol – Quezon Highway na mapalipot nin oras kan viaje haling Bikol pasiring sa Manila. Kun sa ngonian inaabot nin diez oras an viaje sa South road magiging anom na oras na sana kun marealisar an proyecto sa patinampo.


ISYU SA RELOKASYON KAN MGA ELECTRICAL POST

Sa kaparejong miting pinapadali na kan Presidential Adviser for Bicol  Affairs   sa  Casureco II  asin DPWH  an  relokasyon kan mga ulang na poste sa road widening project kan obras publika huli ta delicado sa mga aksidente sa motorista alagad huli ta dai pa nareresolberan an isyu sa conflicto sa cuentada sinugo kan PABA an DPWH na gibohan muna nin temporaryong solusyon sa paagi nin pagpintura nin reflectorized painting kan mga poste.

Pinaapod kan PABA sa sarong orolay sinda Casureco II Project Supervisor Nelson Lalas, DPWH regional director Versola na pigrepresentaran kan saiyang ARD na si Engr. Sarmiento asin assistant district Engr. Ricky Ragragio kan 2nd Engineering District sa CamSur asin nagkaperang miembros kan junta directiva kan cooperativa nganing hanapan nin solusyon an abalang relokasyon.

Parejong nagpaliwanag an Casureco II asin DPWH sa isyu kan saindang kanya-kanyang cuentada sa relokasyon kan mga poste base sa formula na pig-isyu kan DPWH asin DoE sa paagi kan joint memorandum circular.

Alagad nag-rereclamo an DPWH sa Casureco II huli sa halangkaw na cuentada na nag-aabot sa P16.8 milyon mantang sa sadiring cuentada kan obras publika nag-aabot sana sa P9.2 milyon.

Pinaliwanag ni Ragragio huli kan conflicto sa cuentada pinagmarhay na darahon an isyu sa saindang opisina central asin DoE nganing iyo na an magpaluwas nin pinal na desisyon na sagcod sa ngonian mayo pang aksyon.

Si Ragragio, nagcierto sa PABA   na  saindang poponan  tolos  an  pagpintura  kan mga poste na delicado sa mga aksidente sa trafico.                                                                                                                                                                   (dpa)






 

Share on Facebook
Share on Twitter
Please reload