Politico dai makiaram sa Brgy, SK elections - DILG

April 26, 2018

An Department of Interior and Local Government (DILG), premirong mangyayari sa administrasyon Duterte na makikiaram sa nakatalaan na Barangay asin Sangguniang Kabataan elections sa katuyohan na maging malinig asin onesto an pirilian asin dapat dai makiaram an arin man na mga politico.

An mga candidato na madadakop na nagbabakal voto, dai masunod sa reglamento kan tamang sukol kan mga poster asin iba pang masunutil sa Omnibus Election Code puedeng sangatan nin caso kan DILG.
 
Ini an pigtawan punto sa mensaje ni Undersecretary for Barangay Affairs Martin Diño kan DILG sa ginibong Forum on Anti-Illegal Drugs and Corruption na may tema: ‘’Progresibong Bicol Laban sa Droga at Kurapsyon’’ na ginibo sa Avenue Plaza kan Lunes, Abril 23 na inatendiran kan labi sa on mil na Capitanes de Barangay hali sa treinta y cincong municipalidades asin duwang Ciudades kan Naga asin Iriga.

Kabali sa nagtaong mensaje sa tiripon iyo sinda Presidential Adviser for Bicol Affairs dating Juez Marvel Clavecilla asin Chairman Dante Jimenez kan Presidential     Anti-Corruption Commission (PACC) na sararo an saindang panindugan laban sa kurapsyon asin ilegal na droga na saindang hinahagad na dapat magtarabangan asin ponan digdi sa Bikol an programang ini kan administrasyon Duterte para sa good governance.

Dai na kamo makiaram sa eleksyon pabayaan na an tawo nganing maging patas an pagpili nin mga candidato sa Brgy asin SK, sabi sa patanid ni Diño sa mga politico.

Pig-iindorso kan DILG an mga candidato na dapat ‘’Matino, Mahusay, at Maaasahan’’.

An mga politico aram na kan publiko na igwa nang pigmamanok na candidato mientras na kaipuhan sinda sa maabot na eleksyon lokal sa Mayo 2019,  alagad sinabi ni Alex Marpuri kan Comelec Camarines Sur an maabot na pirilian sarong non-partisan alagad langtadan na asin haloy nang ginigibo mantang naghahagad ngani an mga candidato sa barangay na sinda an iindorsong kan politico na yaon sa posisyon.

An Comelec asin DILG nagbilog nin komite nganing estrictong ma-implementar an leyes sa maabot na pirilian para maseguro an malinig asin onestong Brgy asin SK elections. Si Acting Chairman Al Fariño kan Comelec iyo an pamayo mantang si Usec Diño iyo an vice chairman.

Hinagad kan DILG sa tawo na kuanan nin mga retrato sa paagi nin cellphone an mga naheheling na nagbabakal nin voto asin iba pang ilegal na actividades nganing sangatan kan ahencia nin caso asin malaom sa carcel.

Saiya man pinatanidan an arin man na opisyal o miembros kan PNP asin Philippine Army na dai makiaram sa maabot na pirilian.

Sinabi pa na sa 42 mil na barangay sa Filipinas maabot na sa 41,354 an nakaorganisar nin Barangay Anti Drug Abuse Council (BADAC) alagad si dai makaka-organisar kaini sa pigtalaan na ultimong bulan puedeng casohan an opisyales de barangay kan DILG.

Hinagad na kan DILG sa senado an propuestong Magna Carta for Barangay na pendiente pa kan nakaaging 14th Congress na maaprobaran  na nganing gibohon nang regular an sueldo kan mga opisyales de barangay.                                                                                                                                     (DPaureus)    


 

Share on Facebook
Share on Twitter
Please reload