SA CITY HALL: Lalas pinapahali na sa Casureco II

April 26, 2018

Matapos apodon na ‘’ignorance and incompetent’’  si Project Supervisor asin Acting General Manager Nelson Lalas kan Camarines Sur II Electric Cooperative (Casureco II)  sa privilege speech ni Consejal Joselito Del Rosario, hinuhurot na kan Sangguniang Panlungsod sa National Electrification Administration (NEA) na bawion na an nombramiento kan nakatukaw na PS/AGM kan cooperativa.

Sa sesyon regular kan SP kasoodmang Martes, Abril 24 pinangenotan ninda Consejal Joselito Del Rosario asin Vidal Castillo an resolucion na hinahagad sa NEA Administrator Edgardo Masongsong na halion na si Lalas, afuera pa kaini an ika-duwang resolucion hinahagad na ideclara nang vacante an puestong general manager asin tukahan si Casureco I General Manager Ana Sylvia Alsisto bilang concurrent  GM kan Casureco II mientras na dai pa nakakapili nin permanteng GM.

Naging joint and collection an resolucion na ipapadara sa NEA nganing aksyonan mantang an Casureco II dai na kaipuhan an PS/AGM huli ta bako naman ining ailing cooperative.

Papadarahan kopya kan resolucion sinda DOE Secretary Alfonso Cusi asin PABA Marvel Clavecilla .

An SP enot nang nagpasar nin resolucion na hinahagad sa PS/AGM na gamiton na muna an capital expenditures kan cooperativa mientras na pigreresolberan pa an isyu sa cuenta kan DPWH asin kan Casureco II sa relokasyon kan mga electrical post.

Envez na mag-aksyon nagsimbag  sa SP na an fondo ninda sa CAPEX  gagamiton nganing ibakal nin transformer para sa pagbukas kan Economic Zone sa Barangay Carolina, alagad naging cuestionable ini sa consejal huli ta dai pa ngani aram kun nuarin masikad an proyecto.

Si aram ni del Rosario na dakula an fondo kan cooperativa  sa CAPEX huli ta dati siyang director na puedeng hugoton muna an P9 milyon nganing mapunan na an relokasyon kan mga poste na yaon sa laog kan road widening project kan DPWH.

Cierto man sanang aabonaran kan DPWH an masusubleng cuarta sa CAPEX huli ta igwang fondo an obras publika asin nagseguro na babayadan, alagad dai naheheling ni Lalas an mga ulang sa tinampo na puedeng maging dahilan nin aksidente sa motorista.

Nagibo ngani kan Casureco Uno na gamiton muna ninda an cuarta sa CAPEX tano ta dai kayang magibo sa Casureco II.

Digdi niya inapod na ‘‘ignorance and incompetent’’ asin sa garong sa atol performance kan PS/AGM.

Igwa nang mga pig-oopresir na solusyon an SP asin Casureco Uno, alagad habong magdangog an project supervisor.

Na-abala an relokasyon huli ta an 2nd Engineering District kan DPWH an saindang cuentada cantidad sanang P9.2 milyon mientras na sa Casureco II nagcacantidad nin P16.8 milyon.

Huli kaini, hinahalat an aksyon kan opisina central kan DPWH  kun arin an tamang cuentada na dapat sunod mantang nagsunod sinda sa formula base sa joint circular kan DPWH asin DoE.

Kun dai pa naki-aram si Presidential Adviser for Bicol Affairs (PABA) Marvel Clavecilla na hagadon na muna sa DPWH an pagpaluwas nin P9.2 milyon nganing mapunan na an relokasyon kan mga electrical post mientras na hinahalat pa an desisyon kan opisina central kan obras publika mayo pang mangyayari, sabi pa ni del Rosario.





 

Share on Facebook
Share on Twitter
Please reload