PATANID KAN DILG SA MGA CANDIDATO: Mga envuelto sa droga pinapasibog kan COC

Pinapasibog na kan saindang certificate of candidacy sa maabot na Barangay asin Sangguniang Kabataan (SK) elections an nakatukaw na opisyales de barangay alagad re-electionista maging si mga bagong candidato alagad envuelto sa ilegal na droga huli ta masasayang sana an saindang pagcandidato mientras na seguradong cacasohan sinda sa pagbalga sa Acta Republika 9136 o mas midmid sa Comprehensive Dangerous Drugs Act of 2002. Ini an pinaluwas na patanid kan Department of Interior and Local Government (DILG) sa Bikol sa pamamayo ni Regional Director Elouisa Pastor mantang nagrarani na an pirilian sa Mayo 14, 2018 asin estrictong iimplementar kan saindang ahencia na casohan si dapat sangatan nin asunto sa jusgado huli sa droga. Sa entrevista kan Bicol Mail ki Director Pastor, sinabi kaini dawa manggana sinda sa pirilian kun yaon sinda sa listahan kan Philippine Drug Enforcement Agency (PDEA) asin Philippine National Police (PNP) masasayang sana an saindang kapagalan mantang igwang naghahalat nin caso contra sa sainda. An listahan hali sa mga Barangay Anti-Drug Abuse Council (BADAC), igwang hali mismo sa namamanuan kan barangay asin nadakop kan mga awtoridad sagcod na sinangatan nang caso sa corte. Dai palang nahahaloy pigbuyagyag na kan PDEA an 270 mga pangaran nin opisyales de barangay sa nasyon na envuelto sa ilegal na droga alagad an 70 digdi hali sa rehiyon Bikol na iyo an may halangkaw na numero na sabit sa droga. Sinabi ni Regional Director Christian Frivaldo kan PDEA Bikol na katuyohan kan saindang ahencia sa pagpaluwas nin mga pangaran nganing dai na ivoto sa maabot na pirilian sa Mayo 14, 2018 an mga candidato na dorogista o sabit sa ilegal na droga. Nagrereclamo an ibang pigngaranan alagad sinabi kan PDEA Bikol antes pigbulgar an listahan enterong pigserne asin pig-validate kan PDEA, NICA asin PNP. Kun saindong matatandaan may kapot na mahibog na listahan nin mga envuelto sa droga si Presidente Rodrigo Duterte kan mga nakaaging bulan na pigsasabing opisyales de barangay sa nasyon an envuelto sa ilegal na actividad, kabali na duman si hali sa rehiyon Bikol, sabi pa ni Pastor. Igwang hali sa urban asin rural barangay alagad antes isangat an caso sa jusgado pinapaagi man giraray sa due process, sabi pa kan DILG Bikol. Mantang harani na an Barangay asin SK elections, an advocacia kan ahencia na dapat pilion kan namamanuan sa eleksyon sa Mayo 14 si mga candidato na matino, mahusay at maasahan na igwang kuraje sa pagserbe sa barangay para sa tunay na pagbabago. Kan maging juespe de honor si DILG Undersecretary Martin Diño sa ginibong Forum of Anti-Illegal Drugs and Corruption kan nakaaging semana hinagad kaini sa mga politico na dai makiaraman sa maabot na eleksyon asin tawan buelo an mga candidato na maging patas an saindang laban. Dinagdag pa kan DILG na padagos an saindang pag-monitor kan PNP sa mga barangay digdi sa Kabikolan kun activong naghihiro an pig-orgnisar na BADAC na mas madaling maderminaran kun nagtuturog an consejo huli dai nagsusumiter kan saindang report na daing espuersos na malinigan an saindang barangay sa ilegal na droga. An BADAC katuwang kan PDEA asin PNP sa campaña laban sa operasyon kan ilegal na droga asin dakulang bagay an saindang organisasyon sa pagsubaybay kan mga hiro kan mga dorogista sa saindang lugar. An DILG nagpatanid man sa mga barangay na puedeng sangatan nin caso sa pagpabaya kan saindang trabajo kun dai naka-organisar nin BADAC. (DPaureus)