SA CASO KAN MARIANO VS CITY HALL: LGU nanindugan ilaban caso sa SC

Manindugan: Harong kan Namamanuan Proteheran, Defend Our Home, Defend Our Future. Ini an mga nakalaag sa streamers sa atubangan kan edificio kan City Hall asin sa iba pang lugar mientras nakasulot nin puting t-shirt an opisyales lokal, empleados asin opisyales de barangay. Ini an naheling kan publiko sa City Hall sagcod na nag-atubang sa press conference si Alcalde John Bongat kaibanan si Congresista Gabriel H. Bordado Jr. kan tercer distrito kan Camarines Sur asin mga miembros kan Sangguniang Panlungsod na nagkukumfirmar na maplantiar sinda nin motion for reconsideration sa naging desisyon sa 1st Division kan Corte Suprema pabor sa mga irediro kan Mariano sa caso kan propriedad na natitindogan kan City Hall asin iba pang edificio na yaon sa laog kan cinco hektaryang lote. Pig-aandaman na an MR na isasangat sa Supreme Court en banc sa laog nin quince diyas o antes kan Mayo 2, 2018 poon na marecibe an kopya kan Abril 24, 2018. An aldaw pong ini, Miercules, Mayo 2, 2018, ikukurit sa historia kan Ciudad nin Naga bilang Aldaw nin Paglaum. A Day of Hope. Because starting today, we will bring hope for the future of our city; we will unite to defend our home, sabi sa enot na mensaje kan jefe ejecutivo. Likay an alcalde na magsimbag sa nagkaperang mga kahapotan kan media na may merito sa caso. Sa desisyon kan 1st Division kan SC pinapabayad an City Hall nin bulanan na P1.25 milyon na arkila poon kan 2003 hasta ngonian na taon na igwang total na P255 milyon. An envueltong lote pigsasabing pig-donar ninda dipuntong Macario Mariano asin Jose Gimenez. Naging ponente kan desisyon si SC Justice Noel Gimenez Tijam na sarong Bikolano na nag-estar sa Ciudad nin Naga asin digdi nagtapos kan saiyang pagklase sa elementarya asin segundarya. Sabi kan alcalde mayo kan sinambit na dakulang cantidad an ciudad mantang pig-aandaman na kan lokal na gobierno an 30 years sustainable development plan. Dakulang epekto sa ciudad kun papabayadon kan milyones pesos na arkila na ciertong mapaparalisar an mga programa sa social services, mga nakatalaan na iimplementar na proyecto asin dakul pang programa na an makikinabang iyo an namamanuan. ‘‘Kun kaidto City Hall sana, ngonian gabos nang mga opisina sa laog kan City Hall Compound asin sa Civic Center an pinapahali segun sa desisyon. Laomon po nindo na kaming mga opisyales kan ciudad, katuwang an lambang saro sa saindo, gigibuhon an gabos na aksyon legal, tama asin matanos, para sa gabos na presente asin masuronod pang henerasyon. Magkasararo po kita sa pagpamibi. My fellow Naguenos and Naguenas all over the world, let us all pray for wisdom, Let us pray for justice. Let us not lose hope, as together, we shall defend our home, our future,’’ sabi sa mensaje kan jefe ejecutivo. Si Congresista Bordado, na naging City Adminstrator, Consejal asin bise alcalde kan ciudad nagsabi na nakobanan siya sa nagluwas na desisyon kan SC asin nagpahayag nin bilog na suporta sa gigibohon na aksyon kan ciudad. (DPAureus)