51.349 hektarya dai isusuko sa Capitolyo: Tabang ni Diputado Andaya hinagad kan mga paraoma

May 10, 2018

Pasacao, Camarines Sur – Nanindugan an grupo nin mga paraoma sa Barangay Balogo sa banwaan na ini na saindang dai isusuko an 51.349 hektarya sa Capitolyo Provincial kan Camarines Sur nganing halion sa lindong kan Comprehensive  Agrarian Reform Program (CARP) asin iconverter an lugar sa eco-tourism project kan provincia.

An duwang organisasyon nin paraoma digdi na kinababalihan kan Higos Uswag Farmers Association (HUFA) na pinamamayohan  ni Juan Penales bilang chairman asin Pinagpala Fisherfolk and Farmers Association (PFFA) na pinamamayohan ni Eugenio Monares bilang chairman nagkaigwang asemblia kan nakaaging semana na nagkakasararo na saindang ilalaban an saindang deretso na dai maagaw kan gobierno provincial.

Mayo sindang madumanan naghagad na nin tabang ki Congresista Rolando Andaya Jr. kan premir distrito kan Camarines Sur sa paagi nin sarong surat petsado Abril 24, 2018 mientras na an envueltong propriedad igwa sindang pugol na mga documento nganing ilaban an saindang deretso.

  Hahagadon ninda sa diputado na matawan sinda nin matindog na abogado.

Habo na nindang mangyari arog kan controvercia sa mahiwas na kaomahan sa Brgy. San Agustin, Pili, Camarines Sur na gagamiton para sa expansion kan Naga Airport.

Labi sa docientos (200) na mga paraoma an nakikinabang kan agricultural land na nabubuhay  sinda sa pagtanom paroy, mais, kamoteng kahoy asin iba pang produkto agricultural na ferming marhay an saindang mga pag-ani mantang pinapasunod na ninda an organic farming.

Sinabi ni Edgardo Negrito, saro sa mga lider kan mga paraoma an envueltong  propriedad  base sa record kan Department of Agrarian Reform kan Camarines Sur sarong agricultural land covered by TCT. No. 29315, 29316, 29317, asin 29318. An orihinal na kagsadiri kan propriedad iyo si Juan Triviño asin natitulohan ini na nakarehistro sa pangaran kan Bicol Century Development Corporation.

Sa records sa opisina kan Sangguniang Bayan kan LGU  Pasacao, CSur an Land  Use Plan na-aprobaran kan Hulyo 15, 2003 asin igwa pang certificasyon na pig-isyu kan Deputy Zoning Administrator, petsado Septiembre 28, 2007 na an envueltong propriedad dati nang agrikultural hasta sa presente, sabi pa.

Sa propuesto kan LGU Pasacao an sinambit na propriedad  kinakaipuhan nang iconverter sa eco-tourism alagad sinabi kan DAR an envueltong propriedad padagos pang nasa lindong kan CARP base sa pinadarang surat petsado Septiembre 16, 2016 ki Alcalde Niño Tayco ni Engr. Romulo Britanico, PARRO kan Camarines Sur.

Kan Mayo 2, 2018 nataraka an HUFA asin PFFA kan igwang magbutak nin tarpaulin sa saindang lugar na nakalaag ‘’PAISI SA GABOS, Pinapaaram sa gabos na an mga lote na nasambitan sa ibaba ipinag-aplay kan Gobierno Provincial kan Camarines Sur na halion sa lindong kan Comprehensive Agrarian Reform Program (CARP)’’

Tensionado an grupo kan HUFA asin PFFA huli ta surorog an LGU Pasacao, Barangay Council kan Balogo asin Capitolyo Provincial nganing piriton na halion sa CARP an saindang kaomahan na digdi na sinda nabubuhay.


 

Share on Facebook
Share on Twitter
Please reload