Mga paraoma apektado kan unli rice importation

May 10, 2018

Nagtutubod an sarong miembro kan Sangguniang Panlungsod kan Ciudad nin Naga na ciertong apektado an saradit na mga paraoma sa pinaluwas na direktiva ni Presidente Rodrigo R. Duterte na hinahali na an quota sa rice importation sa gabos na negociante nin bagas.

Bako lang digdi sa Ciudad nin Naga an ma-aapekaran envez sa enterong nasyon na dapat gibohan nin pag-aadal asin plano kan gobierno orog na kan Department of Agriculture asin lokal na gobierno.

Ini an pigtawan punto ni Consejal Joselito Del Rosario sa saiyang privilege speech sa sesyon kan consejo kasunod kan pinaluwas ni Presidente Duterte na paborable sa mga negociante alagad an nakakaherak digdi iyo an pobreng paraoma.

Kun  may unli call asin unli text sa cellphone igwa man  ‘’unli rice importation’’  na an nangyayari   ngani sa ngonian palangkaw na palangkaw an presyo nin bagas alagad kun panahon nin  aranihan nagpaparababa  an presyo nin  paroy kan mga paraoma kun saindang  pinapabakal sa pribadong comprador.

Dai na nag-aasa an mga paraoma  asin  consumedores sa  National Food Authority (NFA),  nangyari pa na bakong marhay sa paraoma an direktiva ni Duterte, sabi pa ni Del Rosario.

Sa ngonian dai na estable an suplay nin bagas kan NFA na pueding magcompetencia sa presyo kan commercial rice, afuera kaini hababa an presyo kan saindang pagbakal nin paroy sa mga paraoma dinaog na sinda kan pribadong comprador.

Nakatalaan ipaapod sa masunod na sesyon regular kan Sangguniang Panlungsod si City Agriculturist Edna Bongalonta nganing aramon kun ano an mga plano asin programa kaini sa paraoma na ciertong ma-aapektaran kan unli importation nin bagas, sabi pa kan consejal.


 

Share on Facebook
Share on Twitter
Please reload