SA ROAD WIDENING PROJECT SA NAGA: Dai maponan huli kan mga ulang mga kahoy, estractura

May 10, 2018

Canaman, Camarines Sur – Ano man na oras andam nang iimplementar kan 2nd Engineering District kan Department of Public Works and Highways (DPWH), an P59.8 milyon na road widening project kan M.T. Villanueva Avenue, Ciudad nin Naga alagad pendiente an pagpoon huli kan ulang na mga edificio na an iba nagsasayumang magpagaba apesar na sakop na kan road right of way kan gobierno.

Nadagdagan pa kan mga electrical post kan Camarines Sur II Electric Cooperative (Casureco II) asin mga poon nin kahoy na padagos na pigcocontra kan nagpapabistong environmentalist  na putolon nganing makabuelo an pagpahiwas kan hayapit na tinampo.

Maabot sa sarong kilometro an laba kan tinampo asin kabali sa matatapyasan  iyo an dakulang edificio kan sarong colegio.

Si Engr. Richard Emmanuel P. Ragragio, Assistant District Engineer kan 2nd Engineering District kan obras publika sa Camarines Sur nagsabi na haloy nang na-isubasta an proyecto nganing iimplementar  ngonian na panahon nin tag-init asin bakasyon an mga estudiantes alagad na-aabala huli kan dai pag-cooperar kan ibang apektadong estractura.

Igwa nang ginibong pakiolay sa mga kagsadiri kan apektadong estractura na yaon sa laog kan road right of way alagad an iba nagsasayuma, kun daing mga kaulangan padagos na kuta  an  ginigibong patrabajo kan contratista sa tinampo asin piglalaoman pueding matapos an proyecto antes kan burokasan nin klase sa Hunyo 2018.

An M.T. Villanueva Ave. hayapit na tinampo na kun panahon nin erescuelahan asin maylaog sa trabajo grabe an hibog kan trafico mala ngani inaabot nin treinta minutos antes makaluwas an vehiculos digdi. Ginatos na motorista an nag-aagi digdi haling Tinambac-Siruma, Calabanga, Magarao, Canaman asin Bagumbayan Sur asin Bagumbayan Norte nadadagdagan pa kan maluyang magdalagan na padyak an resulta prakasado an viaje.

  Sa City Hall, si Consejal Vidal Castillo, pamayo kan Committee on Infrastructure sa Sangguniang Panlungsod nagsabi na kan panahon ni dating Presidente Benigno Aquino III an sinambit na tinampo na sarong national road kabali sa tinagamahan nin fondo kan DPWH Central Office kasabay kan road widening project na haling Brgy. Del Rosario, Concepcion Grande hasta Concepcion Pequeña alagad dai na-implementar causa kan pagcontra kan grupo nin environmentalist kan pagpurotol nin mga darakulang kahoy na yaon sa laog kan road right of way.

Isinibog ni dating DPWH Secretary Rogelio Singson an implementasyon kan proyecto asin si fondo ibinuelta sa saindang opisina central.            (dpa)
 



 

Share on Facebook
Share on Twitter
Please reload