Masbate dai pa piglalaag sa Comelec control

Ciudad nin Legaspi – An opisina rehiyonal kan Commission on Election nagpaliwanag na sagcod sa ngonian dai pa sinda nagrerecomendar na ipasa-irarom sa kontrol kan Comelec an bilog na provincia nin Masbate mantang perang aldaw nalang gigibohon na an sarabay na Barangay asin Sangguniang Kabataan elections sa Mayo 14. Si Regional Director Maria Juana Valesa kan Comelec Bikol naglinaw kan sinambit na isyu kasunod kan naging mga pahayag sa media ni PNP Chief Police Director General Oscar Albayalde na an islang provincia nin Masbate yaon na sa Kontrol kan commission. Nakatalaan pa sana nindang orolayan kan Philippine National Police asin Philippine Army digdi sa Bikol an mga pag-andam sa maabot na pirilian orog na sa Masbate huli ta dai pa sinda nakakahaman nin plano kun dapat ipasa-irarom sa kontrol kan Comelec an sinambit na provincia. Bakong madali na magdeclara na ilaag sa kontrol kan commission an sarong provincia mientras na ciertong magkakaigwa nin negatibong epekto sa sarong lugar, sabi pa kan Comelec Bikol. Sa Camp Simeon Ola, an Masbate iyo an may halangkaw na listahan nin mga incidente nin pambabadil sa Kabikolan asin labi na sa cincuenta an naging biktima. An iba digdi igwang relasyon sa nagdadangadang na pirilian mantang an iba pigtutukdong responsable iyo an rebeldeng New People’s Army asin mga pig-aataman na pribadong army nin nagkaperang politico. An Masbate parating maribok na provincia kun panahon nin pirilian na saro sa aksyon kan Bikol PNP iyo an pagbuhay kan Special Operation Task Group nganing maseguro an paz y orden sa aldaw kan pirilian. Sa 9th Infantry Division kan Philippine Army na may base sa Camp Elias Angeles, Pili, Camarines Sur sinabi ni Captain Joash Pramis na igwa na sindang hinaman na action plan sa paagi nin pag-bilog nin Joint Task Force Bikolandia. Mawarak sinda nin mga soldados bako lang sa Masbate alagad sa iba pang provincia sa Bikol na kaipuhan an tabang kan militar nganing maging matuninong an maabot na Brgy. asin SK elections. Sa ibang provincia kan Bikol dawa igwang mga barangay na nasa elections watch list, kontrolado kan PNP an paz y orden alagad mawarak man giraray sinda nin kapupulisan.