Gurang na SK dai papatukawon kan Comelec

May 17, 2018

An  Commission  on Election nagpatanid na ciertong madidiscalificar an mga ganador na nagcandidato sa Sangguniang Kabataan (SK) na labi sa veinte cuatro años an saindang edad kan aldaw nin pirilian kan Mayo 14.
 
Sinabi ni Abogado Maico Julia Jr. Election Officer sa Ciudad nin Naga na viente uno mga nagcandidatong SK chairmen asin councilors digdi alagad sa saindang pagrikisa kan mga certifico de candidatura igwang labi na sa veinte cuatro años an saindang edad.

Nagkapera sa sainda an mga nanggana sa nagtapos na Barangay asin SK elections alagad pigriripaso na kan Comelec Naga si gabos na ganador na sobra na sa tamang edad nganing saindang ipaluwas an listahan.

Dawa cuestionable an saindang candidatura pig-proclamar sinda kan Barangay Board of Canvasser  bilang   nanggana sa  pirilian  asin  naghahalat na  sana  an  Comelec  digdi sa ipapaluwas na desisyon.

Alagad   oras   na magluwas nin  pinal na desisyon an Legal Department kan opisina central kan Comelec ididiscalificar sinda sa puesto na tolos man iimplementar kan Comelec kan ciudad.

Sa reglamento kan commission si nag-ika duwang candidatong SK base sa resulta kan pirilian iyo an ipoproclamar asin papatukawon karibay sa discalificadong candidato, sabi pa ni Julia.

Mientras tanto, saro sanang barangay sa Ciudad nin Naga an nagtabla si voto kan duwang candidatong SK chairman asin ini nangyari sa Barangay Sta. Cruz na piglabanan ninda Roy Jon Saniel asin Kean Gomez na parejong nakakua nin 252 na voto

Tinapos na kasoodma kun siisay an dapat patukawon sa paagi nin toss coin na ginibo sa atubangan ni Election Officer Julia.

Si Saniel iyo an pigdeclarang ganador kan BBOC matapos iyo an manggana sa toss coin na naging emotional sa laog kan opisina kan Comelec huli kan saiyang labi-labing kaogmahan.



 

Share on Facebook
Share on Twitter
Please reload