Peace talk dapat ipadagos-BAYAN

May 17, 2018

An Bagong Alyansang Makabayan sa Camarines Sur nagsusuporta sa liwat na pagbuhay kan peace talk matapos magpalyar ini kan nagtalikod na taon huli kan padaklagan nin mga isyu sa lado kan gobierno asin National Democratic Front of the Philippines (NDFP).

Si Nelsy Rodriguez, lider kan BAYAN nagsabi na bako lang an saindang organisasyon digdi sa Camarines Sur an nagpapabor envez an saindang kaparejong grupo sa Kabikolan. Maging sa saindang kilos protesta saindang hinahagad an pagbuelta kan peace talk na nagkapera nang veces nadiskaril sa administrasyon ni Presidente Duterte asin sa mga nakaaging administrasyon.

Igwa nang na-enot na bilateral ceasefire an mag-ibong na negotiating panels kan nagtalikod na taon alagad napag-araman kan BAYAN na mawot ipadagos an duwang pahinang documento na pigfirmahan kan Abril 5, 2017 ninda Labor Secretary Silvestre Bello III, pamayo kan government panel asin kan mga miembros kaini na sinda Hernani Braganza, Rene Sarmiento, Angela Trinidad asin Antonio Arellano.

Si Fidel Agcaoili, sa lado rebelde  panel bilang chairman, Julieta de Lima, Coni Ledesma, Asterio Palma asin Benito Tiamzon na nagfirma sa ngaran kan NDFP, midmid na organisasyon kan kumunistang grupo.

Sinabi pa kan BAYAN maninigo lang ipadagos an orolay pang katuninongan kun mawot ni Presidente Rodrigo Duterte magkaigwa nin marhay na negosasyon asin taposon an problema sa insurhencia.

Napag-araman pa na igwa nang kasundoan na ipadagos an peace talk matapos enot nang cancelaron ni Duterte kan nagtalikod na taon alagad sinabi pa na iyo na ini ginigibong basehan para sa inisyal na orolay.

Naglalaom sinda na marerealisar man giraray an peace talk mantang parejo man an intensyon kan duwang panels.

   Naging mainit an isyu kan magpaluwas nin direktiva si Duterte sa fuersa armada na kun magka-igwa nin encuentro sa mga rebeldeng New People’s Army asin igwang amasona dapat badilon an atubangan na pribadong parte na kun haen pigdenuncia ini kan mga progresibong grupo.




 

Share on Facebook
Share on Twitter
Please reload