ISYU SA 51 HEKTARYANG DAGA SA PASACAO, CSUR: Documento kan Capitolyo sinikwal kan mga paraoma

Dai mapatubod kan Capitolyo Provincial kan Camarines Sur an grupo nin mga paraoma sa Brgy. Balogo, Pasacao, CSur na sadiri na kan gobierno provincial an 51.349 hektarya daga huli ta bako pang prueba kun igwa na sindang pugol na tax declaration sinda na an maysadiri kan envueltong propriedad nganing halion sa lindong kan Comprehensive Agrarian Reform Program (CARP). Nakapangaran pa ini sa Bicol Century Development Corporation (BCDC) asin igwa nang notice of coverage sa irarum kan CARP kan Department of Agrarian Reform. Ini an paliwanag ni Vincent Penas, Barangay Agrarian Reform Chairman asin saiyang mga pag-iriba sa Pinagpala Fisherfolk and Farmers Association (PFFA) na tinatabangan sinda ni Congresista Rolando Andaya Jr. kan premir distrito sa pagpaliwanag kan isyu legal kan envueltong propriedad kan an grupo mag-atubang sa press conference na ginibo sa sarong restaurant sa Ciudad nin Naga. Saindang sinabi na hinagad na ninda an tabang ni Andaya mantang mayo na sindang madulokan na kasurog huli ta an LGU Pasacao asin Balogo Barangay Council nagsusurog sa Capitolyo Provincial na an katuyohan gibohon na industriyal an mahiwas na kadagaan envez na tabangan an pig-aadaptar nindang organikong pag-oma. Naging emotional an mga pahayag ni Milanny Guavez kan PFFA sa press conference huli ta naglalaom sinda na tatabangan kan LGU Pasacao alagad pang-iipit an ginigibo sa sainda asin igwa pang mga ginigibong harassment contra sa saindang grupo nganing ipirit kan Capitolyo Provincial na halion sa lindong kan CARP an 51 hektarya. Sa isyu kan tax declaration, sinabi sa paliwanag ni Andaya kun maheheling sa documentong ini mapapatubod na sadiri na kan Capitolyo Provincial an mahiwas na kadagaan alagad kun babasahon sa pinakababa na parte nakalaog dyan pigsasabi na ‘’It does not and cannot by itself alone confer any ownership of legal title to the property’’. Afuera pa kaini, igwa pang pendienteng caso civil sa corte entre kan Gobierno Provincial kan Camarines Sur contra Bicol Century Development Corporation et al. Ini susog sa Special Proc. No. P-2230 na yaon sa sala kan Regional Trial Court Branch 32 sa Pili, Camarines Sur. SA CAPITOLYO PROVINCIAL Sinabi ni Provincial Administrator Angel Naval kun nagkaigwa man nin tax declaration an gobierno provincial nagsunod sinda sa tamang proceso sagcod na forfeit kan Capitolyo. An kagsadiri kan propriedad iyo an BCDC na may address sa Mango Avenue, Ciudad nin Cebu na dai nagbabayad kan saindang obligasyon sa buwis sa gobierno. An ginibo kan provincial pig-auction alagad mayo man nagpresentar na mabakal. Sainda pang pinaisi an BCDC na dai man nagtonga boot sabihon dai na interesado. Natapos si peryodo mayo man nangyari sagcod na nagdesisyon an Capitolyo Provincial na i-forfeit nganing magdulok sa Provincial Assessors Office para ma-isyu nin tax declaration. Saiyang kinumfirmar na igwa na sindang pendienteng caso civil sa corte sa isyu sa propriedad vs BCDC. Segun pa sa provincial administrator na pigtawan pa siya nin Special Power of Attorney ni Governador Migz Villafuerte nganing iyo an mag-atubang sa Mediation Board alagad dai man nagtonga an lado kan BCDC. SA LGU PASACAO Si Alcalde Niño Tayco nagpahayag sa media na haloy nang pig-andam kan lokal na gobierno sa tabang kan gobierno provincial an relocation site nin mga informal settlers sa Sitio Pinagpala na igwang siyam na hektaryang daga na namumugtak sa Pasacao Villa Verde na completo nin mga facilidades an eestaran kan apektadong mga familia. Pigbuyagyag pa kan jefe ejecutivo na bako man lihitimong taga Barangay Balogo an mga nagrereclamo envez nagsalta sana hali sa Burias, Masbate. Nagtutubod pa ini na huli kan pagpatubod sa sainda ni Congresista Andaya na sinda inaapi asin an diputado an masalbar nagkusog an boot kan mga paraoma nganing ulangon an plano kan Capitolyo na gibohon industriyal an mahiwas na daga.