Grab taxi, trike yaon na sa Naga

May 24, 2018

YAON na an Grab Taxi asin Grab Trike sa Ciudad nin Naga  na mapoon kan saindang operasyon sa ciudad asin sa mga banwaan kan Metro Naga sa Hunyo 7, 2018.

Dai na makua nin dugang na unit nin taxi asin E-trike envez si dati nang nagkakayod sa ciudad na igwang franquicia sa Land Transportation Franchising and Regulatory Board (LTFRB) asin LGU na dai na makakadugang sa problema sa trafico.

Ini an mga pahayag kan Grab Head Expansion Carlo Cu Unjieng kan mag-atubang sa press conference kaibanan si Alec Francis Santos, jefe kan Arts Culture and Tourism Office kan City Hall na nagpapasabot kan saindang pag-extendir kan operasyon sa Naga, afuera sa nagpapadagos nindang mga ruta sa ciudades kan Manila, Cebu, Davao, Iloilo, Bacolod, Baguio, Cagayan de Oro, Pampanga asin Bataan.

Mapoon sinda sa setenta (70) Grab Taxi asin setenta (70) Grab Trike Units na nag-aasegurar nin toltol na serbisyo sa pasajeros kan ciudad asin pagtaraid na banwaan.

Kinua an serbisyo kan E-trike nganing makatabang sa advocacia kan ciudad na maging malinig an aire digdi.

Sinabi man ni Santos, dakulang bagay sa lado nin pagtalubo nin economia asin negosyo maging sa turista sa Ciudad nin Naga an bagong operasyon kan transportasyon na facil na sa mga pasajeros na maghanap nin taxi sa paagi sana nin pag-down load sa Grab application perang minuto sana yaon na an pampasajerong vehiculo.    

Pig-osipon ni Santos na-isipan kan ciudad na mag-invitar kan Grab Taxi na maglaog sa ciudad huli kan mga reclamo kan mga visitantes asin turista sa over charging sa singil sa flete kan ibang pasaway na chofer nin taxi.

Sa Grab Taxi igwang tarifa na pigpapasunod base sa kasugoan kan LTFRB, alagad afuera kan regular na flete igwang babayadan sa booking na nagcacantidad nin veinte cinco pesos. An P20 para sa chofer kan taxi asin P5 sa Grab company.

‘’With a daytime population of over 1 million people, we saw Naga’s need for improved mobility,’’sabi pa ni Carlo Cu Unjieng.                                                                                                                                                              (dpa)



 

Share on Facebook
Share on Twitter
Please reload