SA CASURECO II: Junta urong sulong sa pagnombra nin OIC GM

May 24, 2018

Atras abante an junta directiva kan Camarines Sur II Electric Cooperative (Casureco II) sa plano na dapat ideclara nang bakante an posisyon na general manager  asin tukahan an sarong department head na mag-asumir bilang OIC GM mantang dai pa nakakanombra an National Electrification Administration nin  permanenteng GM.

Ini an pinaabot na osip kan sarong opisyal kan cooperativa nin electricidad na habo nang magpasambit kan saiyang pangaran.

Sa board meeting kan junta kan Martes, Mayo 22, 2018  antes pigtukar an agenda na dapat bukasan na an posisyon na GM,  nagkaigwa muna nin executive session na pinaluwas muna sa board room si PS/AGM Nelson Lalas.  Pigkasurondoan na magpasar sinda nin resolucion na ideclara nang bakante an posisyon na GM nganing magnombra muna sinda nin Officer In Charge.

  Alagad kan magbalik sa agenda sa board meeting iba na si timplada sa kasundoan sa executive session na presente an pitong miembros kan junta kabali si Board President John Paul Santa Ana envez dapat halaton na muna kun igwang ipapaluwas an NEA  na nagdedeclarado sa Casureco II bilang  triple AAA, iginilid na si orihinal na kasundoan sa orolay.

Napag-araman na si Director Jun Cornelio kan Naga North District iyo si naging movant sa resolucion na bakantehon na asin bukasan na an posisyon na GM, alagad nagtataram man si Lalas asin Board President Santa Ana na envez kan propuestong resolucion halaton na muna an ipapaluwas na bagong categorization kan Casureco II.

Mayong nagsegunda ki Cornelio sagcod na dagos nang iginilid an kasundoan sa executive session na presente an gabos na miembros kan junta na kinababalihan ninda directors, Jessie Delmoro kan Tinambac-Siruma District, Domingo Chancoco kan Pili District, Jun Cornelio kan Naga North District asin Roberto Borja kan Bombon District,  Nicanor Orino kan Magarao District, Gay Pabines kan Milaor District asin Board President Santa Ana.

Pigtutubodan na igwang opisyal kan cooperativa an nag-osip ki Lalas sa ginibong kasundoan sa executive session mala ngani iyo pa an nagsasaway na dai na idagos an resolucion na bukasan na an posisyon na GM.

An aksyon kan junta kasimbagan sa resolucion kan Sangguniang Panlungsod kan Ciudad nin Naga na hinahagad sa junta asin sa NEA para sa tolos-tolos na bukasan na an posisyon na GM kan cooperativa asin magnombra muna nin OIC mientras na dai pa nakakapili nin permanenteng general manager.

Saro pa sa plano kan ibang director hagadon sa NEA na idesignar si Casureco I General Manager Ana Sylvia Alsisto nganing patukawon bilang concurrent GM kan cooperativa.

Naenot kaini an junta directiva nagpasar na nin resolucion kan Enero 23, 2018 na naghuhurot sa NEA na bawion na an nombramiento ni Lalas bilang PS/AGM huli kan maluyang performance asin bagulboan mag-aksyon sa mga reclamo kan miembros-consumedores mantang bako naman ailing cooperative an Casureco II.

Inabot na nin apat na bulan mayong aksyon si NEA Administrator Edgardo Masongsong, apesar na igwa man kaparejong suhay na  resolucion an LGU Calabanga asin Bombon.

Nagrereclamo na an Sangguniang Panlungsod sa maluyang aksyon ni Lalas na iimplementar na an relokasyon kan mga electrical post na yaon sa laog kan road widening project kan Department of Public Works and Highways (DPWH).

Sarong incompetent na PS/AGM si Lalas, sabi sa tuyaw ni Consejal Joselito Del Rosario.




 

Share on Facebook
Share on Twitter
Please reload