Prioridad sa rehabilitasyon kan Capitolyo pigrecomendar kan COA

An annual audit report kan Commission on Audit (COA) iyo na mismo an nagrerecomendar sa gobierno provincial kan Camarines Sur na dapat iimplementar na an rehabilitasyon kan 38 años nang edificio kan Capitolyo Provincial base sa ginibong pag-audit asin susog sa aprobadong Annual Investment Plan (AIP) sa nakaaging mga taon kan 2011, 2012 asin 2013 na pigtagamahan nin milyones pesos alagad inabotan na ngonian na taon 2018 mayong nangyari. Ini an reaksyon ni Congresista Rolando Andaya Jr. kan premirong distrito kan Camarines Sur matapos an nangyaring paglinog kan Sabadong hapon, May 5, 2018 na nagkaigwang daños an lomang edificio, paggatak kan mga semento, mabagsak nang mga kisami na delicado na sa posibleng mga aksidente kan personajes kan gobierno provincial. Napiritan an opisyales asin empleados kan provincia na harakoton an mga gamit sa opisina nganing tuwadan an lomang edificio sagcod na nagbaralyo kan mga opisina sa Convention Center asin sa iba pang vacanteng edificio kan gobierno provincial. Pinaheling sa miembros kan media kan congresista an COA report kan peryodo na nagtapos kan Deciembre 31, 2012 na base sa AIP igwa prosupuestong P50 milyon para sa taon 2011 asin P50 milyon para sa taon 2012 na an fondo gikan sa general fund o kun dai man puedeng i-utang sa bangko. Nagpahayag man nin pagkadisgnar si Andaya mantang kaayon na ngani sa AIP na may fondong P50-M dai man na-implementar an rehabilitasyon. Sa pag-inspeksyon kan Audit Team raot na an edificio, dilapidated na, raot an mga kisami, lanub bilang simbolo nin pag-gogobierno nagrerecomendar an COA na tawan importancia kan Gobierno Provincial arog kan pagtao nin balor sa Gota Beach sa Caramoan, Camarines Sur. SA LADO KAN CAPITOLYO PROVINCIAL Sa entrevista ki Provincial Administrator Angel Naval sa paagi nin telepono sinabi kaini, na haloy nang pigplanohan kan provincia an implementasyon kan construksyon asin paghirahay kan Capitol Complex, alagad dai ninda nakukua si structural plan mientras na kaipuhan digdi mag-retrofit kan edificio. Afuera pa kaini, an provincia dai man puedeng magsadiring desisyon na i-demolished an edificio sagcod na dai pa pigcocondenar asin inaaprobran kan COA. Sinabi pa na kun dai tolos na-implementar an rehabilitasyon kan edificio huli ta pigtawan muna nin prioridad si mga proyecto sa classroom, patinambo asin iba pang basic services sa namamanuan kan provincia. Kun kaidto an edificio puedeng maglawig nin hasta sa cincuenta años alagad sa pinakahuring circular kan COA binaba na ini ngonian sa treinta y cinco años, sabi pa ni Naval. Sinabi man ni dating gobernador asin ngonian 2nd district Congressman LRay Villafuerte na haloy na nindang pigplanohan an rehabilitasyon kan edificio alagad saiyang piglinaw dawa yaon sa AIP na igwang cantidad na P50 milyon dai man nangangahulogan na igwa kan sinambit na cantidad envez puedeng hanapan pa nin fondo sa ibang ahencia huli ta plano pueding dai muna iimplementar kun igwang ibang prioridad na proyecto.