ISYU SA HALANGKAW NA CRIME RATE SA NAGA Sinikwal kan City Hall, NCPO

May 31, 2018

Isinikwal kan City Hall an pinaluwas na datus hali sa Crime Research and Analysis Center kan PNP Director for Investigation and Detection Management (DIDM) na an Ciudad nin Naga iyo an may pinakalangkaw  na monthly crime rate sa enot na apat na bulan kan 2018 sa bilog na nasyon, huli ta mismo an general public an nakakaaram na mayo man nin mga heinous crime sa ciudad na ma-aalarma an publiko.

Ini an reaksyon ni Alcalde John Bongat sa pinaluwas na datus kan DIDM, alagad hahalaton niya an kopya kan report na pinadara sa Naga City Police Office hali sa Kampo Crame antes siya magtao nin dagdag na mga komento sa sinambit na isyu.
Sinabi pa kan jefe ejecutivo sa pigsusumiter na listahan nin mga caso kan NCPO sa saindang regular na mga Peace and Order Council meeting nagbaba pa ngani an crime index sa ciudad gustong sabihon kaini mayo man nakakaalarma digdi kan pigsasabi kan Kampo Krame mala ngani matuninong an satong paz y orden.
An dakul na mga caso sa ciudad mga aksidente sa vehiculo asin iba pang mga menor na caso alagad tutukaron man giraray sa POC meeting an isyu sa halangkaw na crime rate sa ciudad, sabi pa ni Bongat.       
Si Consejal Joselito Del Rosario pamayo kan Committee on Peace and Order sa Sangguniang Panlungsod nagsabi na posibleng may agenda an sinambit na pinaluwas na datus kan Kampo Crame  nganing supogon an Ciudad nin Naga huli ta taga digdi si Bise Presidente Leni Robredo.
Sa mga ginigibong regular na miting kan Peace and Order Council (POC) mayo man nin mga darakulang caso o heinous crime na pinapaabot kan Naga City Police Office envez mga caso sa trafico, crime against property, ilegal na droga mala ngani zero sa casong murder, sabi pa ni Del Rosario.
Sinabi pa ni Del Rosario dapat ipaliwanag kan DIDM kun ano an saindang pigbasehan na formula na posibleng an NCPO iyo sana an nagsusunod sa pigsusumiter na monthly crime report sa Kampo Krame.
Base sa DIDM igwang 273.83 average monthly crime rate poon kan bulan nin Enero hasta Abril 2018 sa Ciudad nin Naga na pigcoconsiderar iyo na an pinakalangkaw sa bilog na Filipinas.
Segun sa pamayo kan Peace and Order Committee dapat aramon kan NCPO kun ano an pigbabasehan na formula kan DIDM huli ta alanganin an pinaluwas na impormasyon mantang an mga Nagueño na mismo an puedeng makataram na an Naga sarong matuninong na lugar.
An Naga matuninong na ciudad kun icocompara sa ibang provincia sa Mindanao maging sa Metro Manila na dakul an pinapaluwas na mga bareta sa television asin periodico nin mga garadanan, robbery hold-up asin iba pang mga heinous crime alagad an Naga iyo an pigdeclara bilang may pinakalangkaw na crime rate sa nasyon kaya bakong makatutubod, sabi pa.


SA NCPO

Ipinahayag man ni SPO2 Tobias Bongon, opisyal na parataram kan Naga City Police Office puedeng halangkaw an crime rate sa Naga mientras na pati na ngani iriwal nin mag-agom saindang pigre-report asin iba pang saradit na caso.
Saiya pang sinabi na nagpaparababa ngani an crime volume digdi asin iyo na an pinakababa sa Bikol sa crime solution efficiency na nasa 55 por ciento. 
Kun  babasehan ta an crime volume compara sa ibang ciudades na pigbasehan  kan computation kan DIDM, an NCPO iyo an may pinakababang crime volume sa mga ciudades sa enterong Filipinas, sabi pa ni Bongon.
An Ciudad nin Naga igwang populasyon na 202,802 compara sa Ciudad nin Quezon na inaabot na nin milyones an populasyon alagad an QC iyo an nangengenotan sa mga ciudades sa nasyon na may halangkaw na crime volume sa enterong Filipinas, sabi pa kan NCPO.
Nagtutubod siya na tama an report kan Kampo Krame alagad kun sa isyu sa seguridad hababa an Naga.
Sa saindang datus an casong reckless imprudence iyo an na-ngengenotan na caso asin nag-iikaduwa iyo an crime against property mayo man nin casong garadanan o heinous crime, kidnaping maging bank robbery. Boot sabihon si mga menor na caso posibleng pigbali sa halangkaw na crime rate sa Ciudad nin Naga. 
Si City Director P/Supt. Jonathan Panganiban kan NCPO na ferming dulag mag-atubang sa mga entrevista kan media, sinabi pa ni Bongon na ‘’proud pa an CD huli ta nagbaba an crime volume kan ciudad.’’                                                                                                                                                    (dpaureus) 

Share on Facebook
Share on Twitter
Please reload