Resolucion kan LGUs vs Lalas dadarahon kan PABA sa DOE

May 31, 2018

Dadarahon sa Department of Energy (DOE) ni dating Juez asin Presidential Adviser for Bicol Affairs (PABA), Marvel Clavecilla an mga resolucion kan mga lokal na gobierno sa Camarines Sur asin Ciudad nin Naga na hinahagad sa National Electrification Administration (NEA) na dapat halion na sa Camarines Sur II Electric Cooperative (Casureco II) si  Engr. Nelson Lalas bilang Project Supervisor asin Acting General Manager mantang an cooperativang ini bako nang ‘’ailing cooperative.’’
Pugol na ni Clavecilla an kopya kan mg resolucion hali sa Calabanga asin Bombon, Camarines Sur Vice Mayor’s League CSur Chapter asin sa Sangguniang Panlungsod kan Ciudad nin Naga na saro sa saindang isyu contra ki Lalas iyo an atrasadong mag-aksyon kan pagbalyo kan mga electrical post na ulang sa pig-iimplementar na road widening project kan Department of Public Works and Highways.
Bilang PABA digdi sa Bikol nagtutubod siya na ma-aksyon si DOE Secretary Alfonso Cusi sa mga kahurotan kan LGUs asin kan Vice Mayors League.
Afuera kan mga resolucion kan LGUs an junta  directiva kan Casureco II nagpasar nin resolucion kan Enero 23, 2018  na dapat i-recall na kan NEA an nombramiento ni Lalas huli kan maluyang magmanijar kan dakulang cooperativa asin atrasadong mag-aksyon sa mga reclamo kan miembros-consumedores.
Sinabi ni Director Jun Cornelio na dapat sarong Bikolano an magmanijar kan cooperativa envez kan dayuhan na ferming mayo sa opisina asin daing gayo prioridad an mga reclamo kan miembros-consumedores.
Maging si PABA Clavecilla natutuyawan an maluyang paghiro kan PS/AGM nganing resolberan an problema sa mga poste na delicado sa mga aksidente sa motorista matatapos nalang an sarong taon na peryodo sa Hulyo 31, 2018.
Sinabi pa kan PABA na ma-direkta siya ki DOE Secretary Alfonso Cusi mantang sakop niya an opisina kan NEA na pinamamayohan ni Edgardo Masongsong.
Sa Joint Circular kan DPWH asin DOE na pigfirmahan kan Hulyo 2017 tinatawan nin sarong taon an mga electric cooperative sa nasyon na dapat  taposon  an  relokasyon kan mga electrical post na ulang sa pagpahiwas kan mga national road asin kun dai matapos sa pigtaong peryodo an cooperativa nin electricidad iyo na an dapat magpasan kan gastos sa pagbalyo nin mga poste hali sa laog kan road right of way.
Nagpasalamat si Cornelio sa aksyon kan PABA huli ta dai pig-aaksyonan kan NEA an mga resolucion contra sa PS/AGM.                                                                                                                             (dpa)

Share on Facebook
Share on Twitter
Please reload