SA PIRILIAN LOKAL SA 2019: Legacion nakaguno na nin amay na asegurasyon sa SP

June 28, 2018

 

Nakakaseguro na nin suporta sa miembros kan Sangguniang Panlungsod kan Ciudad nin Naga si Bise Alcalde Nelson Legacion nganing iyo an tambodan na opisyal na candidato kan Team Naga sa pirilian lokal sa Mayo 2019.

Ini kasunod kan enot na kunfirmasyon kan paluwason nang Liga ng Barangay President asin ex-officio member kan Sangguniang Panlungsod Ramon Tomas ‘Bong’ Sanchez, mismo si Bise Presidente Leni Robredo iyo an nagpahayag  na si Legacion iyo an magiging opisyal na candidatong alcalde kan Partido Liberal sa lindong kan Team Naga.

An pahayag kan bise presidente ginibo sa tiripon kan Liga kan Marso 24, 2018 kan magkaigwa sinda nin consultasyon antes kan Barangay asin Sangguniang Kabataan elections, sabi pa ni Sanchez.

Sa walong consejales na nakuanan nin entrevista kan Bicol Mail, an pito nagpahayag kan saindang asegurasyon asin bilog na suporta  sa bise alcalde alagad an saro sa sainda dai na muna nagtaong pahayag sa dahilan na amay pang orolayan an politica.

Si Consejal Julian Lavadia Jr. nagpahayag na ‘’welcome development, considering na an pinakalangkaw na lider kan LP  nag-indorso  dawa  maagi man giraray sa proceso alagad kun siya (Legacion) na an pigpupolsohan na iyo an madara kan grupo sa sakuya mayong problema alagad sagcod  sa  ngonian an  lider  ko  si  Alcalde John Bongat bilang pamayo kan LP sa ciudad.  Kinumfirmar kaini na mawot niya kuta na magcandidatong alcalde.  Huli kan team work na kaipuhan kan grupo asin nagtaram na an bise presidente na an napipili  niya iyo an bise alcalde suportado ko siya.’’

Sinabi man ni Consejal Vidal Castillo na haloy na sindang nag-iribanan ni dipuntong Alcalde asin DILG Secretary Jesse Robredo asin VP Robredo, kun may decisyon na si VP Leni kan tatambodan na opisyal na candidatong alcalde iyan saiyang irerespeto asin susuportaran.

Si Consejal Elmer Baldemoro nagpahayag na base sa Liga President na mismo  si VP Leni an nagsabi  na  si VM Legacion iyo an magiging candidato kan Team Naga, ‘’sa sakuyang personal na capacidad kun siya an papapilion an satong bise alcalde an magiging masunod na alcalde’’.

Sa sakuya mayong problema premiro siya baga an incumbent vice mayor mantang si Alcalde John Bongat matatapos na an termino so kun iyan an kagustohan kan kadaklan, mayo akong pagcontra kaiyan in fact I will support kun arog kaiyan an kalakawan, sabi man ni Consejal Salvador del Castillo.

Sa pahayag man ni Consejal Mila Raquid-Arroyo, ‘’dai naman kaipuhan orolayan kun siisay an saindang candidatong alcalde huli ta si Legacion iyo ngonian an bise alcalde marhay man siya. An bise alcalde pag may bakante sa higher position siya naman an dapat magsunod’’.

Si Consejal Ray-An Cydric Rentoy na nag-aambisyon magcandidatong bise alcalde nagpahayag na siya (Legacion) iyo na an saiyang susuportaran asin siya an dapat maging opisyal na candidato kan partido.

  Sabi man kan paluwason nang Liga President asin Consejal Bong Sanchez, tiwala siya sa kakayahan kan bise alcalde na sarong abogado mala ngani dakul an mga ginibong bagong programa sa Sangguniang Panlungsod kaya siya an dapat magsunod na jefe ejecutivo.

Si Consejal Nene de Asis na macandidatong bise alcalde nagsabi na pabor siya ki Legacion.

Si Consejal Joselito Del Rosario dai na muna nagtaong reaksyon huli ta amay pa politica.

Sinda Consejal Sonny Rañola asin  Esteban Greg Abonal dai paman nakuanan nin entrevista kan BM.



 

Share on Facebook
Share on Twitter
Please reload