Nawawarang mga paraoma tinalbong sa kanyogan

Ragay, Camarines Sur – Anas nang bangkay an tolong mga residentes kan barangay Patalunan sa banwaan na ini na pigtutubodan dinukot kan militar kan magkaigwang encuentro kan Mayo 13, 2018 entre kan rebeldeng New People’s Army asin mga soldados kan 9th Infantry Division kan Philippine Army. An tolong mga biktima sinda Antonio Bonagua, 19 años, Roberto Ramos, 30 años asin an saiyang tugang na si Romel Naniz, 25 años, mga paraoma asin residentes kan barangay Patalunan, nadiscobre kan maheling kan nagkaperang residentes an kinalotan sa kanyogan sa Sitio Pinagsipitan kan kaparejong barangay. Nadiscobre an tolo sa magkasurohay na kinalotan asin itinalbong sa kanyogan na nabisto sinda si nawawarang residentes kan barangay na enot nang pig-osip sa opisina kan Bagong Alyansang Makabayan sa Ciudad nin Naga matapos kan encuentro kan Mayo 13. An familia kan mga biktima asin BAYAN Camarines Sur nagtutubod na miembros kan militar an nagdukot sa tolo na naagihan sana kan nagpapatroliyang soldados sa barangay Patalunan kasunod kan nangyaring encuentro. Sinabi pa na bakong NPA an saindang mahal sa buhay maging dai man ini naging informer kan militar laban sa rebeldeng grupo. Sa lado kan 9th Infantry Division, sinabi ni Captain Joash Pramis na mayong katotoanan an sinambit na alegasyon asin mayo sindang pigcustodia matapos kan encuentro mantang sinda ngani nag-iinvesigar kan sinambit na insidente. Si Barangay Kapitan Liza Francisco nagpahayag na natatakot na an mga residentes kan saindang barangay asin apektado na an hanap buhay sa kabukidan matapos kan sinambit na insidente asin mas lalong natakot kan madiscobre na ginadan asin tinalbong sana kan responsableng mga personas an tolong mga paraoma. An Ragay Municipal Police Station nagpapadagos pa kan saindang ginigibong investigasyon mantang pigpa-autopsy na an bangkay kan mga biktima. An 9th ID nagpahayag na magpapadagos na magtenir an saindang mga soldados sa sinambit na lugar mantang midmid na influence barangay kan mga rebelde an lugar na ini.